Son günlər separatçı “Dağlıq Qarabağ respublikası”nın “dövlət naziri” erməniəsilli rusiyalı biznesmen Ruben Vardanyanla bağlı müxtəlif ehtimallar səsləndirilir. Bir qism onun Moskvaya qaçdığını geri dönməyəcəyini bildirir, digər qism geri dönərək istefa verəcəyini…

Bununla bağlı Sfera.az-a açıqlama verən politoloq Məhəmməd Əsədullazadə deyib ki, ümumiyyətlə, Rusiyanın “Vardanyan planı”  fiaskoya uğrayıb:

“Kreml tərəfindən Qarabağa göndərilən, Azərbaycanla erməni icması arasında müəyyən təmasların qarşısını alaraq prosesləri daha da böhrana sürükləyən Vardayanın  "döyüşək" ritorikası sabun köpüyü kimi əridi. O, rus sülhməramlı qüvvələrinin maşınının yük yerində Qarabağdan qaçmalı oldu. Halbuki, Rubenin Xankəndidə missiyası separatizmi inkişaf etdirərək ermənilərin Azərbaycana qarşı geniş kampaniyasını təşkil etmək idi. Onun bu hərəkətliliyi ermənilərin etirazı və Azərbaycanın yumşaq gücdən istifadə edərək onun buradan qaçması ilə nəticələndi. Azərbaycan bununla Moskvanın planın darmadağın etdi”.

Siyasi şərhçi Aqşin Kərimov deyib ki, Vardanyanın Moskvaya gedişi barədə məlumatlar həqiqəti əks etdirirsə, bu o deməkdir ki, Azərbaycan və Rusiya Vardanyanla bağlı mübahisəni qapadıb:

“Lakin Moskvanın bundan sonrakı planları üçün kimləri ortaya atacağı bəlli deyil. Bu risk qaldığına görə, Bakı Kremllə danışıqları davam etdirəcək. Bundan sonra Azərbaycan faydalı yataqların qeyri-qanuni istismarına qarşı hərəkətini “post-Vardanyan dövrü” üzərində quracaq. Üstəgəl, Bakının Qarabağdakı ermənilərlə təmasındakı maneə aradan qalxmış kimi görünür. Əgər Qarabağdakı ermənilər Moskva ilə Bakı arasında ikili oyun oynamağa davam etsələr və Ermənistan bundan istifadə etsə, Azərbaycanın cavabından barıt qoxusu gələcək. İstənilən halda, Vardanyanın qaçışı 10 Noyabr Bəyanatının müddəalarının reallaşmasını sürətləndirə biləcək tezisləri inkişaf etdirəcək”.

Günay Rəsulqızı