“Azərbaycan peyklərinin ömrü sona yaxınlaşır” – Osman Gündüz

Azərbaycanın ən bahalı peykinin kosmosa buraxılmasından 10 il ötür. Hazırda göydə 3 peykimiz var və onlardan ən bahalısı “Azerspace-1” peykidir.

Sfera.az xəbər verir ki, Azərbaycan İnternet Forumunun prezidenti, Multimedia Mərkəzinin direktoru Osman Gündüzün məlumatına görə, “Azerspace-1” peyki 15 il xidmət göstərəcək. Yəni, bundan sonra daha 5 il adıçəkilən peykin xidmətlərindən istifadə edəcəyik.

“Azerspace-1” peykinin hazırlanması və orbitə qaldırılmasına 233 milyon dollar xərcləndiyini deyən O.Gündüz bunun 15% -nin büdcə vəsaiti olduğunu xatırladıb.

O.Gündüz qeyd edib ki, Azərbaycanın sahib olduğu peyklərin istifadə müddəti tədricən sona yaxınlaşır:

“Gələn il Azərbaycanın “AzerSky1” müşahidə peykinin ömrü başa çatmalıdır. Dünyanın kosmos bazarında da situasiya kəskin dəyişib. Rəqabət güclənib, peyk texnologiyaları tam yenilənib, çoxsaylı, kiçik ölçülü peykləri kosmosa göndərən xeyli yeni peyk şirkətləri yaranıb.

“Azərkosmos” artıq peyklərimizdən birini hazırlayan Fransa şirkəti ilə, onu orbitə qaldıran Hindistan şirkəti ilə əməkdaşlığı dayandırıb.

“Azərkosmos” hələlik peyklərimizin yenilənməsi ilə bağlı, yeni peyklərin hazırlanmsı və orbitə qaldıracaq şirkətlərlə bağlı, bu sahədə konkret hansı ölkə ilə əməkdaşlıq ediləcəyi haqqında açıqlamalar verməyib.

“Azərkosmos”un rəhbəri Saməddin Əsədov peyk bazarında ən sərfəli şərtlərin İlon Maskın SpaceX şirkətinə mənsub olduğunu da açıqlayıb.

Beləliklə, milli peyk operatorumuzu qarşıda çətin seçimlər və ciddi işlər gözləyir”.

Vasif