Deputat Türkiyə göndərilən vəsaitlərdən faiz tutan bankları TƏNQİD ETDİ
Türkiyədə zəlzələdən zərərçəkənlərə yardım məqsədilə vətəndaşlarımız bank kartları ilə pul köçürmələri edirlər. Lakin işin mənfi tərəfi ondadır ki, AFAD-ın hesabına köçürmələr zamanı 18 faiz kommissiya haqqı tutulur. Beləliklə qarşı tərəfə daha çox pul köçürmək imkanı azalır.
Lakin ölkədə mövcud vəziyyəti nəzərə alaraq daha çox yardım etmək məqsədilə bu faiz dərəcəsini ləğv edən bank xidməti də mövcuddur.
Maraqlıdır, digər banklar da bu təşəbbüsə qoşula bilərmi?
Məsələ ilə bağlı Sfera.az-a açıqlama verən millət vəkili Rüfət Quliyev bankların yardım məsələsində qazanca hədəflənməməli olduğunu deyib:
"Faiz dərəcəsini ləğv edərək, öz köməklərini bu şəkildə göstərən banklar daha humanistdirlər, insanpərvərdirlər. Onların bu addımı alqışlanır. Əfsuslar olsun ki, ianə məsələsində, hətta həyatı risk altında olan insanlara kömək məsələsində də qazanmaq istəyirlər. Dünyasını dəyişən insanların üzərindən qazanmaq olmaz. Biz cəmiyyət olaraq Türkiyəyə yardım göstərilməsində aktiv olmalıyıq.
Sıravi vətəndaşlar, özəl sektorlar, banklar gərək bu istiqamətdə birlik nümayiş etdirsin. Mən bir daha hüznlə Türkiyədə zəlzələ nəticəsində dünyasını dəyişən insanlara Allahdan rəhmət diləyir, yaralılara can sağlığı arzulayıram".
Qeyd edək ki, fevralın 6-da Türkiyədə 7,7 maqnitudalı zəlzələ olub. Nəticədə 3 419 nəfər ölüb, 20 534 nəfər yaralanıb, 5 775 bina dağılıb. Türkiyə Prezidenti Rəcəb Tayyib Ərdoğan ölənlərin xatirəsini anmaq üçün ölkədə 7 günlük matəm elan edib.
Əzizə Zeynal
