Rejissor Kənan MM jurnalistləri təhdid və təhqir etdi-FOTO

Tanınmış şair Salam Sarvanın öz şeirinin Kənan MM-in şeiri ilə müqayisə olunduğu statusun rəy bölməsində adıkeçən rejissor "plaqiat” fikrini dəstəkləyənləri təhqir və təhdid edib. O, şeirinin plagiat olduğunu deyən jurnalistlər Rüfət Əhmədzadə və Sərdar Aminə qarşı nalayiq ifadələrə yol verib, həta jurnalistə "mənə kimsə heç nə deyə bilməz, o adamın ağzını cıraram” deyə hədə-qorxu gəlib. Skrinşotları oxucuların müzakirəsinə təqdim edirik.

Bu barədə Qafqaznews.az-a fikir bildirən jurnalist Rüfət Əhmədzadə bildirib: "Şan-şöhrət və "yaxşı əlaqələr” heç kimə başqalarını təhqir etməyə, qorxutmağa ixtiyar vermir. Mən cənab nazir Ramil Usubova müraciət edirəm ki, mətbuat nümayəndələrinə qarşı hədə-qorxu gələn Kənan Mahmudov (Kənan MM) barəsində təcili ölçü götürülsün. Bu və digər "dəliqanlı”lara yerini göstərmək lazımdır. Adamın 40 yaşı var, amma çılğın yeniyetmələr kimi sosial şəbəkədə ona-buna "xox” gəlir”.

Jurnalist Sərdar Amin isə Qafqaznews.az-a deyib: "Bu adam uzun illərdir Azərbaycan filmindəki, şeirindəki xaosdan istifadə eləyib at oynadır. Filmi, poeziyanı anlayanlar bilir ki, "yazdıqlarında”, "çəkdiklərində” zərrə qədər də sənət yoxdur. Elə əslində buna görə də içindəki enerjini belə məhəlli formada püskürməyi özünə sığışdıra bilir. Nə şairin, nə rejissorun özünə heç vaxt sığışdırmadığı bir yola bu adam özünü rahatlıqla qoya bilir. Bu xarakter hər şeyin göstəricisidir. Əslində mən özümü bu gün yox, bu adamın "şeirləri” seviləndə, "filmləri” baxılanda təhqir olunmuş hesab edirdim. Mən bu adamın filmlərinə baxan bir cəmiyyətə təsir göstərə bilmədiyim zamandan bəri acizəm. Bəli, etiraf eləyirəm, mən bu adamın sevildiyi toplumun məğlub adamıyam. Şəxsimə olunan təhqir bunun yanında heçnədir, heç nə! Mən məsələnin hüquqi tərəfini müvafiq dövlət orqanlarına etibar edirəm. Belə məsələlər bu adamın yazdığı kimi yumruq-təpiklə deyil, dövlət qurumları tərəfindən həll olunur”.