“Ukraynaya silah tədarükünün davam etdirilməsi ABŞ üçün problemə çevriləcək”.

Sfera.az bildirir ki, bunu jurnalistlərə açıqlamasında ABŞ Hərbi Dəniz Qüvvələrinin katibi Karlos del Toro deyib.

O, fikirlərini bu cür ifadə edib:

"Əgər münaqişə daha altı aydan bir ilə qədər davam edərsə, əlbəttə ki, bu, tədarük zəncirini çətinləşdirəcək. ABŞ Müdafiə Nazirliyi hazırda ABŞ hərbi-sənaye kompleksi ilə sıx əməkdaşlıq edir, ondan istehsal həcmini genişləndirməyə və bu yolda maneələri aradan qaldırmağa çalışır.  Pentaqonun rəhbərliyinin iki nümayəndəsi eyni vaxtda bununla bağlı problemləri həll edir - müdafiə nazirinin birinci müavini Ketlin Hiks, nazirliyin satınalma və logistika üzrə müşaviri Bill LaPlante.  Onlar indi müəyyən irəliləyiş əldə etməyə başlayırlar".

Karlos del Toronun fikrincə, Amerika hərbi-sənaye kompleksi insan resurslarının inkişafına, əsas fondlara investisiya qoymalıdır.

“Bu qərarlar şirkətlərin öz daxilində istehsalın sürətini artırmaq üçün qəbul edilməlidir. Bu baş verdikdə, biz daha yaxşı vəziyyətdə olacağıq”, - Hərbi Dəniz Qüvvələrinin katibi əlavə edib.

Günay Rəsulqızı