Ukrayna Silahlı Qüvvələri Xerson vilayətində Rusiya Silahlı Qüvvələrinin iki hərbi bazasını məhv edib. Ruslar Çulakovkada təkcə şəxsi heyəti deyil, həm də hərbi texnikanı itiriblər.

Sfera.az bildirir ki, Ukrayna ordusu Xerson vilayətinin işğal olunmuş hissəsində Rusiya Silahlı Qüvvələrinin yerləşdiyi yerə hücum edib, nəticədə təxminən 500 nəfər yaralanıb və həlak olub. Bu barədə Ukrayna Silahlı Qüvvələrin Baş Qərargahının yanvarın 3-nə olan səhər məlumatında deyilir.

Komandanlıq dekabrın 31-də Xerson vilayətinin işğal olunmuş hissəsində rusların mövqelərinin atəşə tutulduğunu təsdiqləyib.

Ukrayna Silahlı Qüvvələrinin Baş Qərargahının xülasəsində deyildiyi kimi, Ukrayna Müdafiə Qüvvələri Çulakovka qəsəbəsi ərazisində RF Silahlı Qüvvələrinin yerləşdirildiyi yerə hücum edib, nəticədə Rusiyanın 500-ə yaxın hərbçisi ölmüş və yaralanmışdır. Həmçinin ruslar bir neçə hərbi texnikasını itiriblər.

“Ukrayna Müdafiə Qüvvələrinin aviasiyası son sutka ərzində düşmənin şəxsi heyətinin, silah-sursatının və hərbi texnikasının cəmləşdiyi rayonlara 13 zərbə, həmçinin hava hücumundan müdafiə sistemlərinin mövqelərinə 5 zərbə endirib. Komandanlıq ötən sutka ərzində düşmənə məxsus “Ka-52” helikopterini və “Orlan-10” tipli 3 pilotsuz kəşfiyyat təyyarəsini də vurduğunu qeyd edib.

Son 24 saat ərzində Ukraynanın raket və artilleriya bölmələri şəxsi heyətin toplandığı yerləri də texnika ilə vurub, RF Silahlı Qüvvələrinin mövqelərinə zərbələr endirib.

Qeyd edək ki, ötən gün Ukrayna Silahlı Qüvvələrinin Baş Qərargahı Rusiya Silahlı Qüvvələrinin Makeevkadakı keçmiş 19-cu peşə məktəbinin binasında yerləşən bazasının məhv edildiyini təsdiqləyib.

RF Silahlı Qüvvələrinin Makeevkadakı hərbi bazasının məhv edilməsini Rusiya Müdafiə Nazirliyi də təsdiqləyib. Rusiya rəsmiləri Ukrayna Silahlı Qüvvələrinin HİMARS raket artilleriyasından endirdiyi dəqiq zərbə nəticəsində 63 nəfərin həlak olduğunu iddia edib.

Aynil