Bu ölkəyə gedənlərin NƏZƏRİNƏ: COVİD-19-un yeni ştamı sürətlə yayılır

ABŞ yeni ilə koronavirusun yeni dalğası ilə girib.

Sfera.az bildirir ki, “Omikron”nun alt variantı olan “XBB.1.5” ölkədə sürətlə yayılmağa başlayıb. Xəstəliklərə Nəzarət və Qarşısının Alınması Mərkəzlərinin (CDC) məlumatına görə, “XBB.1.5” kimi tanınan ştam ABŞ-da yoluxma faktlarının ümumilikdə 41 faizini təşkil edir. Cəmi yeddi gün əvvəl isə mutasiya nisbəti ümumi halların 21 faizini təşkil edib.

İlk dəfə noyabr ayında görülən varianta ölkənin şimal-şərq hissələrində daha çox rast gəlinib. “XBB.1.5” hazırda Nyu-Yorkdan Meynə qədər sahilyanı ştatlarda yoluxma faktlarının 70 faizindən çoxunu təşkil edir. Milad və Yeni il ərəfəsini əhatə edən tətil mövsümündə səfərlərin sayının artdığına diqqət çəkən mütəxəssislər bunun mənfi nəticələrinin yanvarın ilk həftələrində görünə biləcəyi barədə xəbərdarlıq ediblər. 

ABŞ-ın Cons Hopkins Universitetinin virusoloqu Endryu Pekoş bildirib ki, “XBB.1.5”də hüceyrələrə daha yaxşı bağlanmağa imkan verən əlavə mutasiya var və bu, onun immunitetə müqavimət qabiliyyətini artırır. Pekoşun sözlərinə görə, yeni mutasiya insanları xəstələndirməkdə sələflərindən daha bacarıqlıdır. Yoluxucu xəstəliklər üzrə mütəxəssis Antoni Fauci isə bildirib ki, yeni COVID-19 gücləndirici peyvəndləri “XBB” variantına qarşı müəyyən qorunma təmin edə bilsə də, bu, ən yüksək səviyyədə olmayacaq. Bununla belə, mutasiyanın ağır xəstəliyə səbəb olduğuna dair çox az məlumat var. 

Xatırladaq ki, 2022-ci ilin son həftəsində 2530 amerikalı virusdan ölüb. 

Günay Rəsulqızı