Jurnalistlər üçün ən təhlükəli ölkələr - Hesabat

Sərhədsiz Reportyorlar Təşkilatının (RSF) dərc etdiyi araşdırmaya əsasən, son 20 ildə dünyada 1700-ə yaxın jurnalist öldürülüb.

Sfera.az xarici mediaya istinadən xəbər verir ki, hesabata görə, İraq və Suriya jurnalistlər üçün ən təhlükəli ölkələr adlandırılıb.

Bu ölkələrdə son 20 ildə ümumilikdə 578 jurnalist öldürülüb, bu da dünya üzrə ümumi sayın üçdə birindən çoxunu təşkil edir. Bu ölkələrdən sonra siyahıda Meksika (125 nəfər), Filippin (107), Pakistan (93), Əfqanıstan (81) və Somali (78) yer alır.

Hesabatda həmçinin qeyd olunub ki, media ölümlərinin 80 faizi 15 ölkədə baş verib.

“Ən qaranlıq illər” 2012 və 2013-cü illər olub, bu da böyük ölçüdə Suriyadakı müharibə ilə əlaqədardır. Hesabatda deyilir ki, 2012-ci ildə 144, bir il sonra isə 142 qətl hadisəsi baş verib.

Fevralın 24-də Rusiyanın ölkəyə genişmiqyaslı müdaxiləsindən sonra Ukraynada səkkiz jurnalist öldürülüb. Ukrayna son 20 ildə 25 jurnalistin öldürüldüyü Rusiyadan sonra Avropada media üçün ən təhlükəli ölkə hesab edilib.

Bu il ümulikdə 58 jurnalist öz işlərini yerinə yetirərkən öldürülüb.

Əzizə Zeynal