ABŞ ordusunun məxfi məlumatları yayılıb.

Sfera.az bildirir ki, bu barədə “New York Times” yazı dərc edib.

Belə ki, Pentaqon 11 sentyabr hücumlarından sonra təhlükəsizlik qüvvələri üçün biometrik skaner sistemi tətbiq edib. Həm göz, həm də barmaq izini skan edən cihazlar Əfqanıstandakı ABŞ əsgərləri tərəfindən yoxlanılan şəxsin Pentaqonun məlumat bazasında olub-olmadığını müəyyən edərkən istifadə edilib. Xəbərə görə, bu cihazlardan biri “eBay” internet satış platformasına düşüb.

Alman təhlükəsizlik tədqiqatçısı Mattias Marks 149 dollara satışa çıxarılan cihazı hərracda 68 dollara alıb. Cihazın yaddaş kartında 2632 şəxsin adları, fotoşəkilləri, barmaq izləri və göz skanları yer alıb. Onların bir çoxunun terrorçu və axtarışda olduğu müəyyən edilib, digərləri isə ABŞ hökumətinin işçiləri olub.

ABŞ ordusuna aid olan skanerin Əfqanıstanda istifadə olunduqdan sonra Almaniyada necə satışa çıxarılması isə məlum deyil.

Günay Rəsulqızı