Bu gün Rusiyanın Saratov vilayətindəki Engels hərbi aerodromunda baş verən partlayışlar Rusiyanın Ukrayna ərazisinə təcavüzünün nəticəsidir.

Sfera.az bildirir ki, bu sözləri Ukrayna Silahlı Qüvvələrinin Hərbi Hava Qüvvələrinin spikeri, polkovnik Yuri İqnat deyib.

"Əlbəttə, bunlar Rusiya təcavüzünün nəticələridir. Nə baş verdi? Bunlar bizim artıq eşitməyə öyrəşdiyimiz növbəti şoulardır. Bu, həqiqətən də Rusiyanın bizim torpaqlarımızda etdiklərinin nəticəsidir"- deyə o, şərh edib.


“Gördüyümüz kimi, belə hallar getdikcə daha tez-tez baş verir və ümid edirik ki, bu, yalnız Ukraynaya xeyir verəcək”- o əlavə edib.

İqnatın sözlərinə görə, aerodromdakı partlayışların nəticələrini qiymətləndirmək üçün obyektin peyk görüntülərini gözləmək lazımdır.

"Peyk şəkilləri sizə hər şeyi deyəcək. Gördüyünüz kimi, bu və digər aerodromlarda baş vermiş keçmiş hadisələr hələ də təyyarələrə müəyyən ziyan vurub"- deyə spiker bildirib.

Bununla belə, İqnat hesab edir ki, Engelsdəki bugünkü partlayışlar çətin ki, Rusiyanın Ukrayna ərazisinə növbəti zərbələr endirmək imkanlarına təsir etsin. Buna baxmayaraq, Ukrayna Silahlı Qüvvələrinin spikeri müdafiə qüvvələrinin də Rusiyanın hücumlarına hazırlaşdığını vurğulayıb.

Xatırladaq ki, Rusiyanın Saratov vilayətinin Engels şəhərində dekabrın 26-na keçən gecə partlayış səsləri eşidilib. Rusiya hərbçilərinin məlumatına görə, hava hücumundan müdafiə sistemləri Ukraynaya məxsus pilotsuz təyyarəni hərbi aerodroma yaxınlaşarkən aşağı hündürlükdə vurub. Eyni zamanda trayektoriyasını dəyişərək binaların üzərinə yıxılıb. Nəticədə ən azı üç rus əsgəri həlak olub.

Xatırladaq ki, bu ay Engels hərbi aerodromuna ikinci hücumdur. Dekabrın 5-də səhər saat 6 radələrində də güclü partlayış olub. Həmin gün Ryazan vilayətindəki Dyagilevo aviabazasına zərbə endirilib.

Aynil