Hindistanın Müdafiə Nazirliyi 500 km-ə qədər məsafədə hədəfləri vura bilən ballistik raketlər almağa qərar verib.
 

Sfera.az bildirir ki, bu barədə Hindistanın “The Economic Times” agentliyi məlumat yayıb.
 

Hindistan ordusu təxminən 120 Pralay raketi alacaq. Bildirilir ki, adi hava hücumundan müdafiə sistemlərindən istifadə etməklə belə sursatların qarşısını almaq olduqca çətindir. Hindistanda ballistik raketlərin alınması böyük bir iş kimi qiymətləndirilir. Qeyd edək ki, Çin və Pakistanın da ballistik raketləri var.
 

Raketlərin Çin və Pakistanla mübahisəli sərhədləri boyunca yerləşdirilməsi planlaşdırılır.
 

Raket Müdafiə Araşdırma və İnkişaf Təşkilatı tərəfindən hazırlanıb. Ballistik raketin uçuş məsafəsi 150-dən 500 km-ə qədərdir və gələcəkdə onun uçuş məsafəsi daha da artırıla bilər. Onun yaradılması üzərində iş 2015-ci ildən aparılır. 2021-ci ildə raket uğurla sınaqdan keçirilib. “Pralay” havada müəyyən məsafə qət etdikdən sonra trayektoriyasını dəyişə bilir.
 

“Paralay” raketləri düşmənin uzaq mənzilli hava hücumundan müdafiə sistemlərini, eləcə də digər mühüm düşmən hədəflərini məhv etmək üçün istifadə oluna bilər. Qeyd edək ki, raketlərin əldə edilməsi qərarı Hindistanda Çinin də malik olduğu xüsusi raket qüvvələrinin yaradılması fonunda baş verir.
 

Xatırladaq ki, dekabrın 12-də Hindistan qoşunları Himalay dağlarında mübahisəli sərhəddə Çin qoşunları ilə toqquşmuşdu.
 

Bir müddət əvvəl isə Çin Hindistanla Qalvan vadisində mübahisəli sərhəddə bunkerlər və hərbi anbarlar tikib.

Aynil