Çin ABŞ-ı, Hindistan Yaponiyanı ötəcək – Dünyada iqtisadi mənzərə sürətlə dəyişir
2022-ci ildə dünyada ümumi daxili məhsul istehsalı (ÜDM) nominal qiymətlərlə ilk dəfə olaraq 102 trilyon dollara çatacaq.
Sfera.az xəbər verir ki, 2022-ci ildə ÜDM-in həcminin 100 trilyon dolları ötməsində inflyasiya amilinin təsiri daha güclüdür.
Mərkəzi Londonda yerləşən İqtisadiyyat və Biznes Araşdırmaları Mərkəzinin (CEBR) araşdırmasına əsasən, 2037-ci ilə qədər qlobal iqtisadiyyatın nominal dəyəri təxminən iki dəfə artaraq 206 trilyon dollara çatacaq. CEBR hesab edir ki, artımın hərəkətverici qüvvəsi inkişaf etməkdə olan ölkələr olacaq və onlar inkişaf etmiş ölkələri qabaqlayacaq.
CEBR hesabatda ən böyük dəyişikliyin Çinlə bağlı olduğunu qeyd edib. İki il əvvəl Çinin 2028-ci ildə ABŞ-ı keçəcəyini proqnozlaşdıran təşkilat keçən il proqnozunu 2030-cu ilə təxirə salmışdı. Bu hesabatda isə proqnoz daha da irəli çəkilib və Çinin yalnız 2036-cı ildə ABŞ-ı keçəcəyi proqnozlaşdırılıb.
Hesabata görə, Hindistanın 2026-cü ildə Almaniyanı, 2032-ci ildə isə Yaponiyanı geridə qoyaraq dünyanın 3-cü ən böyük iqtisadiyyatı olacağı təxmin edilir. Hindistan həmin tarixdə 10 trilyon dollarlıq iqtisadiyyata sahib olan üçüncü ölkə olacaq.
Dünyanın ən çox əhalisi olan 4-cü ölkəsi İndoneziyanın 2022-ci ildə dünyanın 17-ci ən böyük iqtisadiyyatından 2037-ci ilə qədər dünyanın 11-ci ən böyük iqtisadiyyatına çevriləcəyi gözlənilir.
Asiyada Vyetnamın, Banqladeş və Fillipinin daha böyük sürətlə iqtisadi dəyərini artırdığı müəyyənləşib. 2021-ci ildən 2037-ci ilə qədər olan müddətdə Vyetnam 39-cu yerdən 26-cı yerə, Banqladeş 34-cü yerdən 20-ci yerə, Fillipin isə 38-ci yerdən 27-ci yerə yüksələcək.
Rusiya iqtisadiyyatının dəyər itkisi davam edəcək. 2022-ci ildə doqquzuncu ən böyük iqtisadiyyat olan Rusiya Ukraynanın işğalından sonra tətbiq edilən sanksiyaların təsiri ilə 2037-ci ilə qədər 14-cü yerə düşəcək.
Azərbaycanda bu ilin sonunda ÜDM-in nominal dəyəri 77 milyard dolları ötəcək və dünyanın 75-77-ci ən böyük iqtisadiyyatına sahib olacaq.
Vasif