“Türk dövlətləri ilə ticarət dövriyyəsi kəskin artıb” – Millət vəkili

“Bu ilin ilk 10 ayında Azərbaycanın Türk dövlətləri ilə ticarət dövriyyəsi rekord səviyyədə artıb. Ötən ilin eyni dövründə 5 Türk dövləti ilə 3 milyard 724 milyon 511 min dollar dövriyyəmiz olduğu halda bu ilin yanvar-oktyabr aylarında dövriyyə 63,4 faiz artaraq 6 milyard 83 milyon 252 min dollara çatıb. Bu, müstəqillik illlərinin ən böyük artımıdır”. 

Sfera.az xəbər verir ki, bunu türk respublikaları arasında ticarət münasibətlərinin indiki vəziyyətini şərh edərkən millət vəkili, iqtisadçı Vüqar Bayramov bildirib. 

V.Bayramov qeyd edib ki, ticarət dövriyyəsinin artmasında Türkiyə ilə əlaqələrimiz xüsusi paya malikdir:

“Lakin digər qardaş dövlətlər ilə də iqtisadi münasibətlərimiz xeyli dərinləşib. Qazaxıstan ilə dövriyyəmiz 5 dəfə artaraq 492 milyon 71 min dollara, Qırğızstan ilə 18,3 faiz artaraq 8 milyon 969 min dollara, Özbəkistan ilə 73,4 faiz artaraq 146 milyon 976 min dollara, Türkmənistan ilə 6,8 dəfə artaraq 377 milyon 242 min dollara, nəhayət Türkiyə ilə 44,6 faiz artaraq 5 milyard 57 milyon 994 min dollara çatıb.

Ticarət dövriyyəsinin böyüməsi birbaşa türk dövlətləri arasındakı münasibətlərin xüsusən son 2 ildə dərinləşməsi ilə bağlıdır. Azərbaycanın əldə etdiyi zəfərdən sonra Türk dövlətləri strateji əməkdaşlığı daha da gücləndiriblər. Azərbaycanın Türk dövlətləri ilə ticarət dövriyyəsinin yaxın illərdə 15 milyard dollaradək yüksəlməsi hədəflənir”. 

Vasif