“Azərbaycanda əvvəl-axır din fənni tədris olunacaq” – Deputatdan AÇIQLAMA

Məktəblərdə dinlə bağlı fənnin tədris olunması təklifi hələ də müzakirə mövzusu olaraq qalır. Təkliflə bağlı etirazlar isə səngimir.

Sfera.az-ın məlumatına görə, mövzuyla bağlı fikirlərini bölüşən Milli Məclisin İctimai birliklər və dini qurumlar komitəsinin üzvü, deputat Ceyhun Məmmədov qeyd edib ki, sözügedən müzakirə Azərbaycanda uzun müddətdir, gedir:

“Bir məsələyə yenidən aydınlıq gətirmək lazımdır. Söhbət orta məktəbdə dinin tədrisindən deyil, dinlər haqqında məlumatların verilməsindən gedir. Bu fənnin tədrisində əsas məqsəd gənclərə milli-mənəvi dəyərlərimiz haqqında məlumatların verilməsi və onların gələcəkdə zərərli təsirlərdən qorunmasıdır. Nədənsə cəmiyyətdə belə fikir formalaşıb ki, Azərbaycan İlahiyyat İnstitutunda yalnız islam elmləri tədris olunur. Əslində isə İlahiyyat İnstitutnda tələbələrə digər dinlər də tədris olunur. Gələcəkdə orta məktəblərdə din haqqında bilgiləri Azərbaycan İlahiyyat İnstitutunun tələbələri verə bilərlər”.

Millət vəkilinin sözlərinə görə, gec-tez bir çox ölkələrdə olduğu kimi Azərbaycanda bu fənn tədris olunacaq: “Nə qədər gec deyil, bu prosesə başlamalıyıq. İlkin mərhələdə bu fənnin tədrisinə pilot layihə şəklində də başlamaq olar”.

Günay Rəsulqızı