“Məsuliyyəti Rusiya daşıyır” – Armen Qriqoryan

"Rusiya Federasiyası Laçın dəhlizinə görə məsuliyyət daşıyır".

Sfera.az erməni mediasına istinadən bildirir ki, bu barədə Ermənistan Respublikası Təhlükəsizlik Şurasının katibi Armen Qriqoryan bu gün Milli Assambleyada Xarici Kəşfiyyat Xidmətinin yaradılmasına dair qanunvericilik paketinin müzakirəsi zamanı bildirib.

“Noyabrın 9-da verilən açıqlama ilə Laçın dəhlizinin məsuliyyəti Rusiya Federasiyasına verildi. Mən müxalifətdən də bu istiqamətdə suallar eşitmək istəyirəm”, - Qriqoryan deyib.

Onun sözlərinə görə, Ermənistan tərəfi Laçın dəhlizinin tez bir zamanda açılması üçün Rusiya Federasiyası ilə işləyir. Qriqoryan deyib ki, bu vəziyyət hər kəsi ayıq-sayıq saxlamalıdır və bununla bağlı hökumət böhranın həlli üçün əlində olan bütün vasitələrdən istifadə edir.

Qeyd edək ki, artıq 9-cu gündür ki, Şuşa ərazisində Rusiya sülhməramlılarının nəzarətində olan yolun bir hissəsində azərbaycanlılar tərəfindən etiraz aksiyası keçirilir. Aksiya Qarabağ iqtisadi rayonunda ekoloji terrora son qoyulması tələbi ilə davam etdirilir.

Əzizə Zeynal