“Ukraynadakı münaqişə uzana bilər”.

Sfera.az bildirir ki, bunu NATO-nun baş katibi Yens Stoltenberq "Frans Press" agentliyinə müsahibəsində deyib.

“Rusiya uzunmüddətli müharibə aparmağı planlaşdırır. Biz onların daha çox qüvvə səfərbər etdiyini, itki verməyə hazır olduqlarını və daha çox silah əldə etməyə çalışdıqlarını görürük”, - Stoltenberq bildirib.

O, münaqişənin danışıqlar masası arxasında yekunlaşacağına əminliyini ifadə edib və əlavə edib ki, istənilən qərar Ukraynanın “suveren müstəqil dövlət” statusunu təsdiq edəcək. NATO-nun baş katibi həmçinin vurğulayıb ki, münaqişənin nizamlanması üçün ən sürətli yol Kiyevə hərbi dəstək verməkdir.

Qeyd edək ki, fevralın 24-də Rusiya prezidenti Vladimir Putin Donbass respublikalarının rəhbərlərinin yardım xahişinə cavab olaraq Ukraynada xüsusi hərbi əməliyyat elan edib. Bundan sonra Qərb Rusiyaya qarşı irimiqyaslı sanksiyalar tətbiq edib və Kiyevə silah və hərbi texnika tədarükünü milyardlarla dollar artırıb.

Günay Rəsulqızı