“Qərb Zelenskini güzəştlərə məcbur edir” - “The Wall Street Journal”
Ukrayna prezidenti Volodimir Zelenski ölkənin ərazi bütövlüyü ilə bağlı kompromislərə razı ola bilər.
Sfera.az bildirir ki, bu iddia ilə “The Wall Street Journal” jurnalı çıxış edib. Yazıda Qərbin mövqelərini dəyişdiyi və atəşkəsə hazır olduğu vurğulanıb. Məlumata görə, Ağ Evin milli təhlükəsizlik müşaviri Ceyk Sullivan Moskva ilə təmaslardan sonra Kiyevə gedib və Zelenskini Rusiya ilə danışıqlar aparmağa, ictimaiyyətə sülh danışıqlarını rədd etməsi ilə əlaqəli çıxışlarını inkar etməyə çağırıb.
“Zelenski bir dəfə mübahisəli şərq ərazilərinin statusunun müzakirəsinin lehinə danışıb. 2021-ci ilin dekabrında, yəni Rusiya hərbi əməliyyatı başlamazdan əvvəl o, Donbass və hətta Krımla bağlı referendumun keçirilməsini istisna etməyib. Hətta mart ayında da bu ərazilərin gələcəyi haqqında hələ də söhbət gedirdi. Lakin güzəşt etmək istəyi ABŞ və Britaniya hakimiyyəti tərəfindən ləğv edilib. İlkin məqsəd - Rusiya qoşunlarının xüsusi əməliyyat başlamazdan əvvəl tutduqları mövqelərə qaytarılmasına nail olmaq, Ukraynanın tam ərazi bütövlüyünün bərpası tələbi ilə əvəz olunub”, deyə nəşr qeyd edib.
“The Wall Street Journal”ın məlumatına görə, Sullivan Zelenskiyə diqqətini mümkün qədər tez real məqsədlərə yönəltməyi tövsiyə edib.
“Əslində bu o deməkdir ki, ABŞ Krım və Donbass əraziləri üzərində Rusiyanın nəzarətinin saxlanmasına razı ola bilər”.
Nəşr bildirib ki, Britaniya zəruri mütləq minimumda israr edir: “Bu da Rusiyanın hücum başlamazdan əvvəl fevralın 23-də tutduğu mövqelərdən geri çəkilməyə borclu olmasından ibarətdir. Almaniya isə Ukraynanın çəkdiyi istənilən qırmızı xətləri dəstəkləyəcəyini bildirib, lakin Rusiya qüvvələrinin bütün “işğal edilmiş” ərazilərdən tamamilə geri çəkilməsini qeyri-real hesab edir. Berlin bu fikirdədir ki, Ukrayna Krımı ələ keçirmək üçün Rusiyaya hücum edərsə, Kremli dərhal kütləvi qırğın silahlarından istifadə etməyə məcbur edəcək”.
Nəşrin müəllifləri hesab edir ki, ABŞ və onun NATO müttəfiqləri indi atəşkəsə daha çox hazırdırlar. "Rusiyanın Krımda və xüsusi əməliyyat başlamazdan əvvəl nəzarət etdiyi Donbass rayonlarında qalacağı Qərbə getdikcə daha aydın olur. Tərəflər bu məsələ ilə bağlı danışıqlara daha sonra razılaşa bilər. Lakin indi prioritet məsələ atəşkəs və döyüşlərdə fasiləni təmin etməkdən ibarətdir” – deyə müəlliflər yazıblar.
Günay Rəsulqızı