“2023-cü ildə Rusiya iqtisadiyyatında böhran dərinləşəcək” – “Alfa-Bank”
2023-cü ildə Rusiya iqtisadiyyatında dərin böhran gözlənilir.
Sfera.az “Kommersant” qəzetinə istinadən xəbər verir ki, bu haqda proqnozu Rusiyanın “Alfa-Bank”nın iqtisadçıları açıqlayıb.
Bank iqtisadçıları əmindirlər ki, gələn il Rusiya iqtisadiyyatının tənəzzülü qlobal maliyyə böhranından bəri rekord səviyyəyə çatacaq. Onların hesablamalarına görə, 2023-cü ildə ölkənin ümumi daxili məhsul (ÜDM) istehsalı 6,5% azala bilər.
Eyni zamanda, Rusiyada istehlak tələbinin azalması və şəxsi kapitalın xaricə axını gözlənilir. Bank, gələn ilin sonuna kimi inflyasiyanın 6%-ə qədər güclənəcəyini də təxmin edir. “Alfa-Bank” Makroiqtisadi Təhlil Mərkəzinin rəhbəri Natalya Orlova deyib ki, reallıqda çox şey proseslərin mənfiyə doğru gedəcəyinə işarə edir:
“Əhali azalır və Rusiyadan miqrasiya axını var. Bu o deməkdir ki, istehlak bazarları üçün gələn ilin üfüqləri buludlu olacaq. İnvestisiyalarda azalma ikinci mühüm komponentdir. Ölkəmizdə mülkiyyət dəyişikliyi səbəbindən investisiya planlarını əhəmiyyətli dərəcədə dəyişib. Bu mənada gələn il investisiya aktivliyi azala bilər. Üçüncü mühüm amil ixrac riskləridir. Bazar hazırda neftin qiymətinin tavanına diqqət yetirir, “Qazprom” ixrac həcminin azaldığını bildirir. Proqnoz verən zaman sadaladığımız bütün risk sahələri nəzərə alınmalıdır”.
Qeyd edək ki, Rusiyanın Mərkəzi Bankı gələn il ölkə iqtisadiyyatında 2,3 faizlik kiçilməni proqnozlaşdırır.
Vasif
Sfera.az
