Niyə ABŞ-ın əksər qanunvericiləri Azərbaycanı dəstəkləmir? – Tomris Azəri AÇIQLADI

“Niyə ABŞ-ın əksər qanunvericiləri mənfi fikirdədirlər və ya Azərbaycanı dəstəkləmirlər? Bunun günahkarı kimdir? Diasporumuz? Mən belə inanıram”.

Sfera.az bildirir ki, bunu Amerika-Azərbaycan Cəmiyyətinin sədri Tomris Azəri deyib.

O qeyd edib ki, Frenk Pallone, Robert Menendez, Adam Schiff kimi şəxsləri günahlandırmaq tamamilə düzgün deyil: “Onlar qanunsuz heç bir iş görmürlər, sadəcə olaraq seçicilərinin təsiri altındadırlar. Həmin şəxslər bu seçiciləri təmsil edən təşkilatlar tərəfindən maliyyələşdirilir və bu seçicilər tərəfindən vəzifəyə seçilirlər - həmişə öz maraqlarına xidmət etmək üçün onlara birbaşa təsir göstərirlər. Bu, tamamilə qanunidir. Bunu etiraf etməyi sevməsəm də, təəssüf ki, doğrudur. Bizim camaat bunu etmir, başqaları da edir və onlar yalan məlumat yaymaqda, qanunvericilərimizin dəstəyini qazanmaqda uğur qazanırlar. Əgər biz illər əvvəl ASA-nın vizyonunu həyata keçirsəydik, bəlkə də hər şey başqa cür olardı. Qanunvericilərimiz fərqli baxışa malik olardılar və bizi daha yaxşı tanıyardılar. Ermənilərin hər yerdə icma mərkəzləri və kilsələri var, onlar hər dəfə öz icmaları ilə bir araya gələndə nifrət, kin və intikam təbliğatı aparırlar. Biz onlardan çox fərqli bir toplumuq. Məqsədimiz sevgini, sülhü, hörməti, hər kəsi qəbul etməyi öyrətməkdir. Biz bütün icmaları bir araya gətirmək istəyirdik. Əlaqələr qurmaq, digər icmaların etimadını qazanmaq, dostluq etmək daha vacib idi. Təsəvvür edirdim ki, bu, Amerika ictimaiyyətində belə cəlbedici təəssürat yaradacaq və bizim Azərbaycanı tanıtmaq məqsədimizi daha da artıracaq. Arzum yenidən müxtəlif obraz və dünyagörüşü yaratmaq idi. İnanırdım ki, bu imic və bizim güclü mədəniyyətimiz, irsimiz Azərbaycan diasporu imicini Amerikada unikal səviyyəyə çatdıracaq”.

T.Azəri bildirib ki, bu gün belə bir icma mərkəzi olsaydı, Amerikada doğulmuş uşaqlarımızın də gələcəyi fərqli olardı: “Təsəvvür edin, Amerikada doğulmuş bu uşaqların bəziləri artıq universitetləri bitiriblər, burada yüksək səviyyəli mühüm işlərə malikdirlər. Eyni zamanda biz çoxlu yeni dostlar, digər icmalarla əlaqələr qurardıq, qanunvericiləri cəlb edərdik. İnanıram ki, bir çox qanunvericilər bizim yanımızda olardı. Mən qürurlu, pozitiv insanam, hələ də imtina etməmişəm! Təslim olmayacağam. Yeni qərarlar, yeni ümidlər və arzularla yaxınlaşan Yeni il.. Arzum gerçəkləşəcək, buna həqiqətən inanıram”.

Günay Rəsulqızı

Sfera.az