Mərkəzi Bankın ehtiyatları 8 milyard dollara çatdı - Ən çox artım bu il olub

Azərbaycan Mərkəzi Bankının (AMB) valyuta ehtiyatlarının həcmi 8 milyard dollara çatıb. 

Sfera.az AMB-yə istinadən xəbər verir ki, noyabrda ehtiyatlar 166 milyon dollardan çox artaraq 7,969 milyard dolları keçib. Yalnız bir ayda ehtiyatların həcmi 2,12 faiz artıb. 

2022-ci ildə ehtiyatların həcmində davamlı artım müşahidə edilib. İlin əvvəlində AMB 7,075 milyard dollar ehtiyata sahib olduğu halda son 11 ayda ehtiyatların həcmi 894 milyon dollardan çox artıb. Bu il ehtiyatların həcmində 12,6 faizdən çox artım qeydə alınıb. 

Xatırladaq ki, AMB sonuncu dəfə belə yüksək ehtiyata 2015-ci ildə sahib idi. Amma sonrakı illərdə ehtiyatlar azalaraq 3,9 milyard dollara qədər azalmışdı.
Bu il ehtiyatların həcminin xeyli artmasına səbəb ölkəmizdə dollara tələbin azalmasıdır. AMB dollara olan tələbi tənzimləmək məqsədilə dollar alışını artırıb, əvəzində dövriyyəyə manat buraxıb. 

Buna görə də son aylarda AMB-nin ehtiyatlarında ciddi artım baş verib. 

Vasif
Sfera.az