100 min Ukrayna əsgəri və 20 min mülki şəxs həlak olub - Avropa Komissiyası
Avropa Komissiyasının rəhbəri Ursula fon der Leyen bildirib ki, Rusiya suveren dövlətə təcavüz də daxil olmaqla, törətdiyi dəhşətli cinayətlərin əvəzini ödəməlidir. Onun sözlərinə görə, indiyədək Ukraynada 20 mindən çox mülki şəxs və 100 min hərbçi həlak olub.
Sfera.az bildirir ki, Avropa Komissiyası sədrinin çıxışının videosu “Twitter”də yayımlanıb.
"Rusların Ukraynaya hücumu ölüm, dağıntı və saysız-hesabsız iztirablar gətirib. Biz hamımız Buçanın dəhşətlərini xatırlayırıq" - deyə fon der Leyen qeyd edib.
Avropa Komissiyasının rəhbəri qeyd edib ki, Aİ Beynəlxalq Cinayət Məhkəməsinə dəstəyini davam etdirir və Rusiyanın təcavüzü nəticəsində cinayətlərin araşdırılması və mühakimə olunması üçün BMT-nin dəstəyi ilə ixtisaslaşmış məhkəmənin yaradılmasını təklif edir. Bu məqsədlə Avropa Komissiyası maksimum dəstək əldə etmək üçün beynəlxalq ictimaiyyətlə dialoqa başlamağa hazırdır.
Bundan əlavə, fon der Leyen Ukraynaya dəymiş ziyanın məbləğini açıqlayıb.
Onun sözlərinə görə, ölkədə müharibə nəticəsində dağıntılar 600 milyard avro dəyərində qiymətləndirilir. "Rusiya onun vurduğu dağıntılara görə də təzminat ödəməlidir. Ukraynaya dəymiş ziyan 600 milyard avro qiymətləndirilir. Rusiya və onun oliqarxları Ukraynaya dəyən ziyanı ödəməli və ölkənin yenidən qurulması xərclərini ödəməlidirlər"- deyə fon der Leyen bildirib.
O, Rusiya Mərkəzi Bankının 300 milyard avroluq ehtiyatlarının bloklandığı və rus oliqarxlarının 19 milyard avroluq pulunun dondurulduğu üçün Aİ-nin Rusiyanı ödəməyə məcbur etmək üçün imkanlarının olduğunu vurğulayıb. Avropa Komissiyasının rəhbərinin sözlərinə görə, qısa müddətdə bu vəsaitləri idarə etmək və investisiya üçün struktur yaradıla bilər.
“Sanksiyalar aradan qaldırıldıqdan sonra bu vəsait Rusiyanın Ukraynaya vurduğu ziyana görə tam təzminat ödəməsini təmin etmək üçün istifadə olunmalıdır”, - deyə fon der Leyen çıxışını yekunlaşdırıb.
Xəbər verdiyimiz kimi, bundan əvvəl Avropa İttifaqı Rusiyaya qarşı doqquzuncu sanksiya paketini hazırlayıb. Avropa Komissiyasının sədri Ursula fon der Leyenin sözlərinə görə, Aİ Ukraynaya qarşı müharibə aparmaq qabiliyyətini zəiflətmək üçün Rusiyanı ən ağrılı yerlərinə zərbələr endirməyə çalışır. Noyabrın 24-də Avropa İttifaqının energetika nazirləri Rusiya qazının birgə satınalma müqavilələrindən çıxarılması barədə razılığa gəliblər.
Avropa Komissiyasının bəyanatında deyilir ki, Avropa ölkələri beynəlxalq bazardan qaz alacaq və Rusiyadan mavi yanacaq verməkdən imtina edəcək.
