Rusiya Təhlükəsizlik Şurasının sədr müavini Dmitri Medvedev sivil dünyanın NATO kimi "cinayətkar təşkilat”a ehtiyacının olmadığını deyib.

Sfera.az "TASS"a istinadən xəbər verir ki, Medvedev sözgedən təşkilat üzvlərinin dünya əhalisinin təxminən 12%-ni təşkil etdiyini vurğulayıb.

"NATO ölkələri planet əhalisinin 12%-dən çoxunu təşkil etmir. Sivil dünyanın bu təşkilata ehtiyacı yoxdur. O, bəşəriyyət qarşısında tövbə etməli və cinayətkar təşkilat olduğu üçün özünü buraxmalıdır", - Medvedev Teleqram kanalında yazıb.

Rusiya təhlükəsizlik rəsmisinin sözlərinə görə, NATO dövlət çevrilişlərini təşkil etmək və qanuni dövlət liderlərini devirmək də daxil olmaqla, bütün dünyada etdiklərini “asanlıqla unudub”. Medvedev əlavə edib ki, təşkilat və onun rəhbərliyi, görünür, əməliyyatları və ekstremist rejimlərə silah tədarükü nəticəsində çoxsaylı mülki əhali itkilərini də unudub.

Medvedev həmçinin NATO-nun baş katibi Yens Stoltenberqin Ukraynanın suverenliyini və müstəqilliyini qoruyub saxlamaq zərurəti ilə bağlı son açıqlamalarını da şərh edib.

Əzizə Zeynal