Alimlər pizza və un məmulatlarını sağlıqlı etməyin yolunu tapıblar 

Çoxumuz sağlamlığımızı və həzm prosesini yaxşılaşdırmaq üçün pəhrizdə bol lif istifadə edə bilərik.

Sfera.az xarici elmi nəşrlərə istinadən bildirir ki, avstraliyalı alimlər yeməklərin görünüş və dadını pozmadan bizə bunu etməyə kömək edəcək xüsusi məhsul hazırlayıblar.

Avstraliyanın RMIT Universitetinin bir qrup alimi dəyişdirilmiş nişastadan ibarət “FiberX” adlı xüsusi məhsul hazırlayıb. Tədqiqatçılar “FiberX”in təbii yolla yetişən buğda, qarğıdalı və manok nişastalarından hazırlandığını qeyd edir.

Əslində bu, həzm sisteminə lif kimi təsir edir. İnsan bağırsağında həzmə müqavimət göstərir, mikroorqanizmlərə onu fermentləşdirməyə imkan verir və ümumi həzm prosesini potensial olaraq yaxşılaşdırır.

Eyni zamanda, alimlər əmin edir ki, yeni məhsul yeməklərə heç bir mənfi təsir göstərməyəcək - pizza və ya tortların dadı, rəngi və hətta strukturu eyni qalacaq. “FiberX” tərtibatçıları öz məhsullarının çoxfunksiyalı olduğuna əmindirlər. Bu məhsul az lifli, həm də az kalorili, az glisemik məhsullara əlavə oluna bilər. Bundan əlavə, yeni kəşf glutensiz pəhrizə riayət edənlər üçün də uyğundur. Alimlər hesab edirlər ki, ağ çörəyə, hamburger çörəklərinə, pizzaya və tortlara “FiberX” əlavə etmək valideynlərin uşaqlarının pəhrizinə sağlıqlı tərəvəzləri başqa qidalarda gizlədərək əlavə etməsinə bənzəyir.

Testlərdə alimlər dad, qoxu və ya teksturaya zərər vermədən reseptlərə 20%-ə qədər “FiberX” əlavə edə biliblər. Yeni məhsul geniş miqyaslı istehsala gətirmək üçün daha çox araşdırma və istehsal texnologiyasının təkmilləşdirilməsi tələb olunacaq, lakin tədqiqatın nəticələri ümidvericidir.

Qeyd edək ki, lif insan bağırsağı tərəfindən həzm olunmayan, həzm sistemimizin fəaliyyətini yaxşılaşdıran və sağlamlığını qoruyan karbohidratdır. Əvvəlki araşdırmalar göstərir ki, lif həm də tip 2 diabetin inkişafının qarşısını almaqda, həmçinin ürək-damar xəstəliklərinin inkişaf riskini əhəmiyyətli dərəcədə azaltmaqda mühüm rol oynayır.

Aynil

Sfera.az