Türkiyə müxalifəti seçkilərə vahid namizədlə qatılacaq – 84 bəndlik razılaşma

"Türkiyə müxalifətinin “Altılı masa”sı Konstitusiya dəyişikliklərinə dair 84 maddədən ibarət təkliflər paketi ilə bağlı razılığa gəlib. Dəyişiklik təkliflərinin təməlini parlament üsul-idarəsinə keçid, insan hüquq və azadlıqlarının genişləndirilməsi təşkil edir".

Sfera.az xəbər verir ki, bunu siyasi məsələlər üzrə ekspert Şahin Cəfərli bildirib. Ekpsert növbəti ilin yanvarında seçkilər üçün vahid namizədin kimliyininin bəlli olacağını deyib:

“Altılı masa” iqtisadi böhrandan çıxış və digər sahələr üzrə proqramlarını, prezidentliyə vahid namizədin manifestini, seçkidə qalib gəldikdən sonra formalaşdırılacaq koalisiya hökumətinin protokolunu da razılaşdıraraq xalqa açıqladıqdan sonra seçki kampaniyasına daxil olmağı planlaşdırır. Yəni seçkiqabağı və seçki sonrası yol xəritəsi tam müəyyənləşdirildikdən sonra vahid namizədin adı elan ediləcək (böyük ehtimalla 2023-ün yanvarında). Nəticədə vahid namizəd bədahətən fikirlər istehsal etmək məcburiyyətində qalmadan seçki kampaniyasına əlində hər sahə üzrə konkret vədlərin və problemlərdən çıxış yollarının göstərildiyi proqram sənədləri ilə girmiş olacaq.

“Altılı masa” xarizmatik liderin ətrafında formalaşan və xalqın, dövlətin taleyini həmin avtokrata həvalə edən iqtidardakı Cumhur İttifaqı koalisiyasından fərqli olaraq, dəyərlərə və prinsiplərə əsaslanan bir ittifaq və ölkə idarəçiliyi modeli ortaya qoyur. Fərqli ideologiyalara, proqramlara sahib 6 siyasi partiyanın qarşılıqlı kompromislərlə milli maraqları əsas götürən siyasət anlayışının ortaya qoyması yüksək siyasi mədəniyyət göstərici olmaqla, Türkiyə siyasi tarxində görünməmiş bir hadisədir. Bu birlik seçki ittifaqının çərçivəsindən çox uzağa gedən, bütövlükdə sistemin köklü şəkildə rekonstruksiyasını nəzərdə tutan tarixi əhəmiyyətli siyasi konsensusdur".

Xatırladaq ki, 2023-cü ilin iyun ayında Türkiyədə növbəti prezident seçkiləri keçiriləcək.

İnci