KTMT Ermənistan-Azərbaycan sərhədinə misiya göndərə bilər - Stanislav Zasdan açıqlama

"KTMT Ermənistana kömək üçün bir sıra tədbirlər görməyi, o cümlədən vəziyyəti qiymətləndirmək məqsədilə Azərbaycanla sərhədə missiya göndərməyi təklif edib".

Sfera.az xarici mediaya istinadən xəbər verir ki, bunu təşkilatın baş katibi Stanislav Zas Ermənistanda keçirilən KTMT iclası və regional vəziyyət barədə danışarkən deyib.

“Vəziyyət o qədər də asan deyil. İlk növbədə Azərbaycanla Ermənistan sərhədində demək olar ki, hər gün atışmalar olur. Ümumiyyətlə, KTMT-nin Ermənistana yardım etmək üçün təklif etdiyi tədbirlər silsiləsi və oradakı vasitələr müxtəlifdir. Buraya həm siyasi, həm diplomatik, həm hərbi, həm də sərhədə vəziyyəti real qiymətləndirəcək missiyanın göndərilməsi daxildir”, - Zas Belarusun ONT telekanalına müsahibəsində bildirib.

Zas qeyd edib ki, KTMT-nin Yerevan sammitində həm qlobal səviyyədə, həm də KTMT-nin məsuliyyəti sferasında kollektiv təhlükəsizliyin hər üç regionunda - Şərqi Avropa, Qafqaz və Mərkəzi Asiyada inkişaf edən vəziyyətə xüsusi diqqət yetirilib.

“Bütün iştirakçıların diqqət mərkəzində regionda sülhün əldə olunmasıdır. Sülh müqaviləsinin imzalanması, mövcud sərhədlərin hüquqi qeydiyyatı, nəqliyyat əlaqələrinin açılması istənilir”, - baş katib deyib.

Zas bildirib ki, Ermənistana yardım göstərilməsi ilə bağlı qərar layihəsi hazırlanır. Onun sözlərinə görə, layihə yekunlaşdırılıb, lakin bəzi məqamlarda hələ də müzakirələr gedir.

Bundan əlavə, o qeyd edib ki, təşkilatın məsuliyyət zonasında münaqişələrin həlli ayrılıqda hər bir ölkənin deyil, onun üzvlərinin ümumi işidir.

“KTMT zonasında bütün mövcud münaqişələrin həlli prioritetdir. Öhdəliyimiz çərçivəsində sülhə nail olmaq bizim ümumi vəzifəmizdir”, - Zas bildirib.

Əzizə