"Kiyevdə yaza qədər işıq olmaya bilər” -  Vitali Kliçko

Kiyev meri Vitali Kliçko şəhər sakinlərini elektrik enerjisinin verilişində yaranan fasilələrin yaza qədər davam edəcəyinə hazır olmağa çağırıb. Bələdiyyə sədri bununla əlaqədar şəhər əhalisinin bir hissəsinin qismən təxliyə olunacağını istisna etməyib.

Sfera.az xəbər verir ki, Kliçko “RBC-Ukrayna”ya müsahibəsində Kiyevdə elektrik enerjisi təchizatının artıq bərpa olunduğunu, lakin ümumukrayna elektrik şəbəkəsində yaranan çatışmazlıq səbəbindən fasilələr yaranacağını deyib: “Fasilələr yaza qədər ola bilər. Bu da soyuqların düşməsi ilə bağlıdır. Buna görə də soyuq hava davam etdikcə elektrik enerjisi təchizatında fasilələr olacaq”.

Vitali Kliçko Kiyevdən qismən təxliyə olacağını da deyib: “Tam evakuasiya olmayacaq – bəlkə də, qismən, amma bunu evakuasiya adlandırmaq olmaz. Bu, müəyyən kateqoriyadan olan insanların xidmətlərin yerləşə biləcəyi şəhərətrafı ərazilərə müvəqqəti köçürülməsidir".

Xatırladaq ki, noyabrın 23-də Ukrayna Prezidenti Volodimir Zelenski ölkə ərazisinin Rusiya tərəfindən kütləvi zərbələrə məruz qaldığını bildirib. Bununla əlaqədar Kiyev işıqsız qalıb. Noyabrın 27-də Kiyevə elektrik enerjisi təchizatı tam bərpa olunub. 

Vasif
Sfera.az