“Azərbaycan antiterror əməliyyatı keçirə bilər” - Deputat

Ermənilərin rus sülhməramlılarının yerləşdiyi ərazilərdə aktivləşdiyi müşahidə edilir. Son bir ayda erməni tərəfi Qarabağda yeni mühəndis istehkam xətti formalaşdırıb.

Maraqlıdır, erməni tərəfi ordunu gücləndirərək yeni təxribata əl ata bilərmi? Vəziyyətin gərginləşməsi gözləniləndir?

Mövzu ilə bağlı Sfera.az-a açıqlama verən deputat Arzu Nağıyev ermənilərin son zamanlar aktivləşməsində rus sülməramlılarının, xarici havadarların rolunun olduğunu deyib:

“Bu proseslər Ermənistandakı daxili siyasətdən qaynaqlanır. Belə ki, Koçaryan və onun komandasının aktivləşməsi, Vardayanın iş başına gətirilməsi burada həlledici rol oynayır. Ermənistanın havadarları, xüsusilə Vardaryanı ora göndərən Rusiya çalışır ki, bölgədə gərginlik daha da artsın. Azərbaycanın vəziyyəti stabilləşdirmək üçün irəli sürdüyü 5 təkliflə razılaşmamaq üçün ermənilər ciddi cəhdlər edirlər. Bunun da səbəb olduğu əsas problem Qarabağda qondarma qurumun ordusunun saxlanılmasıdır. Digər məsələ sülhməramlı qüvvələrin öz üzərilərinə düşən missiyanı tam yerinə yetirməməsidir. Son zamanlar rusların Azərbaycan toponimlərini erməni adları kimi göstərməsi, eyni zamanda Ermənistan ərazisindən hərbi texnikanın daşınmasına nəzarət etməsi kimi məlumatlar var. Bu və ya digər şəkildə kiməsə kömək etmək rus sülhməramlısının vəzifə öhdəliyi deyil. Onlar gözəl başa düşür ki, sülh müqaviləsi imzalanan kimi ərazidən çıxarılacaqlar. Odur ki, mandatlarının müddətini uzatmağa cəhd göstərirlər. Bununla da 10 noyabr, Brüssel, Soçi danışıqlarının ruhuna zidd addımlar atılır”.

Deputat Azərbaycanın antiterror əməliyyatlarına başlaya biləcəyini, bunun isə beynəlxalq səviyyədə qarşıdurma yaradacağını sözlərinə əlavə edib:

“KTMT-nin son iclasında Paşinyanın atdığı addımlar, Rusiyaya qarşı apardığı təbliğat Qərbə daha çox yönəlmək məqsədi güdür. Rusiya da bunu başa düşür və önləyici addımlar atmağa çalışır. Erməni tərəfi tez-tez qondarma status məsələsini qabardır, yaxud son vaxtlar bəyanatlar verirlər ki, guya bu gün disapor təşkilatları onlara yardım edir. Lakin bu da məğlub tərəfə sərmayə yatırmaq deməkdir və özlüyündə inandırıcı görünmür. Ona görə də düşünürəm ki, Ermənistan qaçaq yolla daşınan pul vəsaitlərini leqallaşdırmaq istəyir. Belə davam etsə, Azərbaycan heç bir  beynəlxalq sazişi pozmadan antiterror əməliyyatları keçirə bilər. Bu proses isə tək regionda yox, beynəlxalq səviyyədə qarşıdurma yarada bilər”. 

Əzizə Zeynal