Şakira üsyan etdi: “Bu, böhtan kampaniyasıdır”

Kolumbiyalı məşhur pop ulduz Şakira İspaniyada vergidən yayınmaqda ittiham olunmasını özünə qarşı "böhtan kampaniyası" adlandırıb.

Sfera.az xarici mediaya istinadən bildirir ki, 45 yaşlı Şakira ispan hakimlərini şəxsi həyatının "məxfiliyini pozmaqda" günahlandırıb.

Qeyd edək ki, bu ilin sentyabrda ispan hakimləri Şakiranın 14,5 milyon avro məbləğində vergidən yayınma ittihamı ilə mühakimə olunmasına qərar verib.

İddiada Şakiranın 2012-2014-cü illərdə İspaniyada yaşamasına baxmayaraq, yaşadığı yeri başqa yerdə göstərərək vergi ödəməkdən yayındığı qeyd edilib.

Xatırladaq ki, İspaniya qanunları ölkədə ildə 183 gündən çox qalanların vergi ödəməsini tələb edir. Məhkəmə 2011-ci ildən ispaniyalı futbolçu Jerar Pike ilə birlikdə olan pop ulduzun 2012-ci ildə Barselonada ev aldığını göstərən sənədi üzə çıxarıb. 2015-ci ildə rəsmən İspaniyaya köçən pop ulduz indiyə qədər 17,2 milyon avro vergi ödədiyini və heç bir borcunun olmadığını bildirib.

Pop ulduzun 6 ayrı vergi ittihamı ilə 8 il həbs və 23,8 milyon avro pul cəzası ilə mühakimə olunacağı işin tarixi hələ müəyyənləşməyib.

Məlumat üçün bildirək ki, Şakiranın ötən aylarda 11 illik münasibətinə son qoyduğu məşhur futbolçu Pike də daha əvvəl başqa bir işdə vergidən yayındığı üçün 2,1 milyon avro cərimə olunmuşdu.

İnci