Ukrayna Həmrəyliyi Layihəsinin fəalları Avstriyanın Zalsburq şəhərində məşhur enerji istehsalçısının baş ofisi qarşısında “Red Bull Putinə qanad verir” (“Red Bull Putini ruhlandırır”) yazılmış nəhəng pankart açıblar.

Sfera.az bildirir ki, bu barədə beynəlxalq layihənin “Twitter” səhifəsində məlumat verilib.

Pankartda Rusiya prezidenti Vladimir Putin şirkətin loqosu olan öküzün üzərində sinəsi çılpaq mindiyi təsvir edilib. Fəallar işğalçı ölkəyə enerji içkilərinin hələ də verilməsinə etiraz ediblər. Fəallar qərargahdakı etiraz aksiyasından əlavə, müxtəlif idman növlərini təmsil edən 670 Red Bull idmançısına da müraciət ediblər. Onlar şirkətin Rusiyanı tamamilə tərk etməsinə kömək etməyə çağırıblar.

“Bununla (Rusiya bazarında qalmaqla) siz Kremldəki rejimə legitimlik vermiş olursunuz”- deyə fəallar şirkətə müraciətində vurğulayıblar.

Kollajda fəallar Putinin Qərb siyasətçiləri tərəfindən məsxərəyə qoyulan məşhur fotosundan istifadə ediblər. Şirkət isə öz növbəsində aksiyaya cavab olaraq “Red Bull”un 2022-ci ilin mart ayının əvvəlində bütün marketinq fəaliyyətlərini və Rusiyaya investisiyaları dayandırdığını bildirib. “Red Bull” Aİ və ABŞ-ın bütün sanksiyalarına əməl edir.

Xatırladaq ki, oktyabrın 22-də 78 yaşında avstriyalı milyarder və iş adamı Ditrix Matesşitz vəfat edib. O, enerji içkiləri istehsal edən “Red Bull” şirkətinin yaradıcısı, həmçinin iki Formula 1 komandasının və futbol klublarının sahibi olub.

Aynil

Sfera.az