Avropa Komissiyasının rəhbəri Ursula fon der Lyayen Avropanın Ukraynada döyüşləri dayandırmaq üçün Rusiyanı ən həssas nöqtələrdən vuracağını bildirib.

Sfera.az xarici mətbuata istinadən bildirir ki, Avropa İttifaqı Rusiyaya qarşı doqquzuncu sanksiyalar paketini hazırlayır. Bu barədə Avropa Komissiyasının sədri Ursula fon der Lyayen Finlandiyaya səfəri zamanı keçirdiyi mətbuat konfransında deyib.

Onun sözlərinə görə, Aİ Rusiya Federasiyasını ən həssas yerlərdə vurmağa və Ukraynada döyüş qabiliyyətini zəiflətməyə çalışır. "Mən elan edə bilərəm ki, biz doqquzuncu sanksiyalar paketi üzərində tam sürətlə işləyirik" - deyə fon der Lyayen bildirib.

Avropa Komissiyasının rəhbəri G7 ölkələri və digər tərəfdaşlarla Rusiya neftinə qlobal qiymət limitinin tezliklə təsdiqlənəcəyinə əmindir. "Ukrayna Vladimir Putini, onun vəhşi və varvar müharibəsini məğlub etməyincə sakitləşməyəcəyik" - deyə o, sözlərini yekunlaşdırıb.

Ursula fon der Lyayen AB sanksiyalarının yeni raundunun hansı məhdudiyyətləri əhatə edə biləcəyi barədə təfərrüatları açıqlamayıb.

Xatırladaq ki, noyabrın 23-də Avropa Parlamenti Rusiyanı terrorizmin sponsoru kimi tanıyıb. Avropa Parlamentinin deputatları mühüm sanksiyaların işlənib hazırlanmasını və təcavüzkarın beynəlxalq təcrid olunması üçün şərait yaradılmasını zəruri hesab edirlər.

ABŞ isə Rusiyaya qarşı sanksiyaları qismən yumşaldıb.

Amerika firmaları mülki aviasiya uçuşlarının təhlükəsizliyini təmin etmək üçün Rusiyanın sanksiya tətbiq etdiyi şirkətlərlə əməliyyatlar apara bilər. Rusiya neftinin alışını məhdudlaşdırmaq barədə danışılsa da, bəzi Avropa ölkələri bunu davam etdirir. Bolqarıstan bu yaxınlarda embarqodan yan keçərək, Rusiya neft məhsullarının ixracına dair “Lukoil” ilə razılığa gəlib. Noyabrda Rusiyadan Aİ-yə dizel yanacağının ixracı xeyli artıb.

Qərb ekspertləri bunu Moskva embarqonun tam işə salınmasından əvvəl maksimum gəlir əldə etməyə çalışması ilə izah edib.

Aynil

Sfera.az