Azərbaycan Milli Xalça Muzeyinin direktoru Şirin Məlikova Xalq artisti Fikrət Əmirovun 100 illik yubileyinin qeyd edilməsi məqsədilə noyabrın 22-də təşkil olunan konsert proqramının təşkilatçılarını tənqid edib. 

Sfera.az xəbər verir ki, Ş.Məlikova bununla bağlı sosial şəbəkədəki profilindən paylaşım edib.  

Ş.Məlikova bildirib ki, o, konsertdə iştirak edib, amma gözlədiyi musiqi proqramı və təşkilatçılıqla qarşılaşmayıb:

“Biz bu konsertə görkəmli bəstəkarın sevimli əsərlərini dinləmək ümidi ilə getdik. Fikrət Əmirovun musiqisi nəsilləri birləşdirir, əbədidir, bütün janrlarda yaratdığı əsərləri xalqımızın səsidir. Onun musiqisi çox millidir, qulağa düşür, onları dinlədikcə tariximizin, musiqi mədəniyyətimizin əzəmətini hiss edirsən.Konsert ərəfəsində bu haqda danışdıq, müəyyən parçaların ən yaxşı ifasını xatırladıq. Amma lap əvvəldən, ilk akkordlardan elə bir hiss var idi ki, nəsə səhv gedir. Səs keyfiyyəti, səhnə tərtibatı, dramaturgiya yoxluğu, çox zəif səs keyfiyyəti - səs mühəndisi problemi, orkestr ilə pianoçu arasında komanda işinin olmaması, heç bir məşq olmadığı hissini yaradırdı. Səs mühəndisliyində problem var idi, orkestr vokalçıları boğurdu, ifaçılar daha yüksək səslə oxumağa məcbur oldular, ona görə də səs mədəniyyətindən, musiqi duyumundan söhbət gedə bilməzdi. Sadəcə qışqırıq eşidilirdi və bütün bunlar toylar üçün dəhşətli musiqi tərtibatını xatırladırdı. Hətta sevimli dirijorlarımız da vəziyyəti xilas edə bilmədilər - orkestrlər yaxşı ifa etdilər, lakin ümumi təəssürat məyusedici idi”.

Ş.Məlikova vurğulayıb ki, bunlar F.Əmirovun yüz illiyinə həsr olunmuş konsertdə baş veribsə, bu, bir siqnaldır və təcili tədbirlər görülməlidir:

“Burada problem təşkilatçılarda, ifaçı seçimində, rejissorluqdadır. Bu cür səviyyədə konsert təşkil edilməsi qeyri-peşəkarlıq və öz işinə sevginin olmamasının göstəricisidir. Hesab edirəm ki, bunu müzakirə etmək, məsələni qaldırmaq və həll etmək lazımdır”. 

Orxan