Rusiya yenidən Kiyevə hücum edib. Paytaxtda bir sıra partlayış səsləri eşidilib, hadisə yerinə həkimlər və xilasedicilər göndərilib.

Sfera.az Ukrayna mətbuatına istinadən xəbər verir ki, hücum nəticəsində infrastruktur obyektlərinin zərər gördüyü bildirilib. Kiyevdə ilk partlayışların saat 14:04-də qeydə alınmasına baxmayaraq, daha sonra da şəhərdə təkrar partlayışların baş verməsi barədə məlumat yayılıb. Kiyev meri Vitali Kliçko infrastruktur obyektlərindən birində zərbənin qeydə alındığını təsdiqləyib. Mer həmçinin Kiyevin müxtəlif rayonlarında bir neçə partlayışın qeydə alındığını, həkimlər və xilasedicilərin hadisə yerinə yollandığını bildirib.

Bundan başqa, paytaxtın bəzi ərazilərində fasilələrlə elektrik enerjisi kəsilib. Bu arada, Kiyev metrosunda şəhərə bir neçə gəlmənin olduğu barədə məlumat verildikdən sonra işıqlar qismən söndürülüb. Həmçinin metronun “Vydubıçi” stansiyasının fəaliyyətinin müvəqqəti dayandırılması ilə bağlı məlumatlar yayılıb.

Bundan əlavə, teleqram kanalları raket hücumları nəticəsində mülki avtomobillərin yandığını və şahidlərin sözlərinə görə, hündürmərtəbəli binanın vurulması qeydə alınıb. Zərbə nəticəsində ikimərtəbəli binaya da ziyan dəyib, 1 nəfər ölüb, 1 nəfər yaralanıb.

Partlayışlar Ukraynanın bir sıra bölgələrində də səslənib. Xüsusilə, Nikolaev, Dnepropetrovsk, Zaporojye, Odessa, Poltava vilayətlərində və Xersonda raket zərbələri endirilib.

Krım istisna olmaqla, bütün bölgələrdə hava hücumu xəbərdarlığı səslənir.

Aynil

Sfera.az