Qanunsuz balıq ovlayanlar cəzalandırıldı

Xəzər dənizinin Bakı, Sumqayıt şəhərləri, Siyəzən, Xaçmaz rayonları akvatoriyasında, Mingəçevir su anbarında və Kür çayında qanunsuz balıq ovlayan şəxslər saxlanılıb.

Dövlət Ekoloji Təhlükəsizlik Xidmət rəsmisi Bəhruz Məhəmmədov bildirib ki, Xidmətin əməkdaşları tərəfindən keçirilən növbəti nəzarət tədbirləri zamanı brakonyerlərin Bakı şəhər sakini Ələsgər Vahabov, Sumqayıt şəhər sakini Ziyad Əhmədov, Xaçmaz rayon sakinləri Emirmət Vəlimətov və Ceyhun Səmədov, Siyəzən rayon sakini Nəsrəddin Musayev, Mingəçevir şəhər sakini Sahib Mahmudov, Yevlax rayon sakini Vasif Bəkirov və Salyan rayon sakini Daşqın Əliyev olduğu müəyyən edilib:

"Onlardan istifadəsi qadağan olunmuş ov alətləri və 620 metr uzunluğunda sintetik tor götürülüb".

B.Məhəmmədov onu da qeyd edib ki, eyni zamanda, keçirilən nəzarət tədbirləri zamanı Şabran, Biləsuvar və Neftçala rayonlarında qanunsuz ov edən şəxslər saxlanılıb: “Araşdırma zamanı brakonyerlərin Quba rayon sakini Zabit Əliyarov, Biləsuvar rayon sakinləri Ələkbər Bədəlzadə və Saleh Hüseynli, Neftçala şəhər sakini Xəyal Sadıqov olduğu məlum olub. Faktlarla bağlı təqsirkar şəxslər barəsində protokol tərtib edilib”.