Bayden Ukraynaya silah tədarükünü dayandırır? - İDDİA

Son günlər bəzi mənbələr iddia edir ki, ABŞ-ın Ukrayna üçün silah sistemləri və sursatları tükənir. ABŞ Prezidenti Cozef Baydenin bundan sonra Ukraynaya yardım göstərə bilməyəcəyi qeyd edilir.

Maraqlıdır, ABŞ tərəfindən Ukrayna üçün ayrılan silah-sursat həqiqətən tükənirsə, bu, müharibənin gedişatına təsir edə bilərmi? Ukraynaya dəstək üçün ABŞ-a alternativ ölkə hansıdır?

Mövzu ilə bağlı Sfera.az-a danışan politoloq Samir Hümbətov ABŞ-ın rəsmi qaydada Ukraynaya yardım etməli olduğunu bildirdiyini deyib. Politoloq Baydenin təkcə hərbi yardımla bağlı yox, digər məsələlərdə də öhdəlik götürdüyünü vurğulayıb:

"Hesab etmirəm ki, ABŞ elə bir kiçik dövlət ola ki, onun Ukraynaya verəcəyi silah-sursat azalsın. Nəzərə almaq lazımdır ki, iyun ayında ABŞ Konqresi Ukraynaya yardım etməklə bağlı Lend Liz qanununu qəbul etdi. Həmin qanuna əsasən, ABŞ-da olan hərbi sursat və texnika limitsiz şəkildə Ukraynaya ötürülə bilər. Bu qanunda həmçinin dərman və ərzaq vasitələri kimi digər humanitar yardımların da Ukraynaya ötürülməsi yer alır. Bu baxımdan ABŞ-ın yardımı dayandırması real görünmür".

Ekspert Ukraynaya ABŞ-dan əlavə Böyük Britaniya və müttəfiqlərinin də yardım edə biləcəyini deyib:

"Əgər ABŞ Ukraynaya yardım məsəlsində silah-sursatı azaldarsa, o zaman  Böyük Britaniyanın Baş nazirinin Ukraynaya səfəri fonunda adıçəkilən ölkənin digər müttəfiq dövlətlərlə yardımı davam etdirməsi mümkündür. Bundan başqa, Qərb dövlətləri yardımı davam etdirməklə Rusiyanı geri addım atmağa da məcbur edə bilərlər. Nəzərə almaq lazımdır ki, Rusiyanın özündə də İrandan aldığı texnikalara baxmayaraq, silah-sursatın tükənməsi müşahidə edilir. Demək olar ki, hər gün müharibəyə milyardlarla dollar pul xərclənir. Bütün bunların müqabilində ən ideal variant Ukraynaya ABŞ tərəfindən dəstəyin göstərilməsidir. Əgər ABŞ yardım göstərə bilməsə, digər dövlətlər bu işdə yardımçı olacaq".

Əzizə Zeynal