Zelenskini bu açıqlamanı verməyə Bayden məcbur edib - DETALLAR

Ukrayna lideri Zelenski Moskva ilə danışıqlara başlamaq üçün əsas şərtlərindən biri ilə bağlı güzəştə gedib.

Sfera.az bildirir ki, bu barədə "Politico" qəzeti öz mənbələrinə istinadən məlumat yayıb. Qeyd olunub ki, ABŞ administrasiyası Zelenskini Rusiya prezidenti Vladimir Putinlə danışıqların mümkünsüzlüyü ilə bağlı bəndi şərtlər siyahısından çıxarmağa məcbur edib.

Məlumata görə, noyabrın 7-də Zelenski Moskva ilə danışıqlara başlamaq üçün beş şərt sadalayıb və onların arasında Putinlə danışıqların mümkünsüzlüyündən bəhs edilməyib. “Politico” bildirib ki, sözügedən mövqe dəyişikliyi isə ABŞ prezidenti Co Bayden administrasiyasının yumşaq təzyiqi  ilə birbaşa bağlıdır.

Qəzetdə dərc olunan yazıya görə, Kiyev və Vaşinqton arasında uzun sürən danışıqlar, o cümlədən ABŞ-ın milli təhlükəsizlik müşaviri Ceyk Sullivanın Ukraynaya səfəri Zelenskinin yanaşmasını yumşaldıb. Bildirilib ki, ABŞ rəsmiləri Zelenskidən danışıqlarla bağlı mövqeyini birbaşa  dəyişməsini istəməyib:

“Lakin Ukrayna prezidentinə çatdırıblar ki, Kiyev münaqişəni sülh yolu ilə sona çatdırmağa hazır olduğunu dünyaya nümayiş etdirməlidir”.

Mənbələrdən biri nəşrə deyib ki, Vaşinqton danışıqların dərhal başlamalı olduğuna inanmır.

Qeyd edək ki, bundan əvvəl Rusiyanın xarici işlər naziri Sergey Lavrov ölkə rəhbərliyinin hələ də Ukrayna ilə danışıqlara hazır olduğunu söyləmişdi.

Günay Rəsulqızı