Moldova Ədliyyə Nazirliyi Konstitusiya Məhkəməsinə müraciət hazırlayıb və bu müraciətdə “Şor” partiyasının konstitusiyaya zidd olduğunun tanınmasını tələb edib.

Sfera.az xarici mətbuata istinadən bildirir ki, analoji müraciət Nazirlər Kabinetinin sabah keçiriləcək iclasında baxılmaq üçün hökumətə təqdim ediləcək.
Moldova Ədliyyə naziri Sergey Litvinenko etirazçıların qanunsuz kimi tanınması üçün kifayət qədər hüquqi əsasların olduğunu vurğulayıb.

Onun sözlərinə görə, öz məqsədləri və ya fəaliyyəti ilə siyasi plüralizmə, qanunun aliliyi, suverenlik və müstəqillik prinsiplərinə, habelə Moldova Respublikasının ərazi bütövlüyünə qarşı çıxan siyasi birləşmələr konstitusiyaya ziddir.

 

Litvinenko rəsmi sosial şəbəkə hesabında:
 

““Şor”partiyası fəaliyyəti boyu qanunun aliliyi prinsiplərinə zidd fəaliyyət göstərib. Bu partiyanın qanunsuz maliyyələşdirilməsi məhkəmələrin yekun qərarları ilə də öz təsdiqini tapıb. Qanunsuz maliyyələşməyə görə bu partiyanın namizədləri seçkilərdən kənarlaşdırılıb. Habelə, ABŞ hakimiyyətinin gəldiyi qənaətlər, eləcə də ictimaiyyətə açıqlanan materiallar sübut edir ki, bu partiya xarici dövlətin maraqlarını təbliğ edir. Ölkənin suverenliyinə və müstəqilliyinə qarşı fəaliyyət göstərir”- yazıb.


Ədliyyə naziri onu da əlavə edib ki, müraciət tərtib edilərkən AİHM-in məhkəmə təcrübəsi və Venesiya Komissiyasının standartları nəzərə alınıb.

 

Sergey Litvinenko məlumatını:
 

“Bu, həqiqətən də son tədbirdir, çünki onlar qanunu pozmağa davam edirlər və qanuni yola qayıtmaq istədiklərini göstərən heç bir hal yoxdur”-cümlələri ilə yekunlaşdırıb.
 

Xatırladaq ki, Moldovada artıq üçüncü aydır ki, “Şor” partiyasının təşəbbüsü və Kommunist Partiyasının dəstəyi ilə kütləvi etiraz aksiyaları keçirilir və bu aksiyalarda sosial vəziyyətdən narazı olan vətəndaşlar Nazirlər Kabinetinin istefasını, növbədənkənar prezident və parlament seçkiləri tələb edirlər.
 

Etirazçıların arxasında cinayətkar qruplarla birləşmiş Rusiyayönlü partiyalar olduğunu deyən prezident Maia Sandunun tələbi ilə polis və prokurorluq əməkdaşları fəalları təqib etmək üçün tədbirləri gücləndiriblər.

Noyabrın əvvəlində ABŞ-ın Kişinyovdakı səfiri Kent D.Loqsdon da Moldova iş adamı Vladimir Plahotnyuk (Demokrat Partiyasının keçmiş rəhbəri) və siyasətçisi İlan Şor (Şor partiyasının lideri) qarşı korrupsiyaya görə sanksiyalar tətbiq edildiyini bəyan etmişdi.

Eləcə də Moldova üzərində nəzarəti bərqərar etmək məqsədilə ölkənin siyasətinə təsir göstərməkdə ittiham olunan bəzi Rusiya vətəndaşları və şəxslərə qarşı da sanksiya tətbiq edilib.

Xanım