Rusiyada hərbi xidmət müddəti artırılır? – Peskovdan AÇIQLAMA
Rusiyada bir neçə deputat orduya çağırış müddətinin uzadılmasını təklif edib. Məsələn, Federasiya Şurasının Beynəlxalq Əlaqələr Komitəsi sədrinin birinci müavini Vladimir Cabarov ötən ay iki illik hərbi xidmət təcrübəsinə qayıtmaq barədə çıxış edib. Onun fikrincə, bu, Rusiya Silahlı Qüvvələrinin sayını artıracaq və peşəkar döyüşçülər yetişdirməkdə kömək edəcək.
Dövlət Dumasının deputatı Mixail Şeremet də xidmət müddətinin iki ilə qədər artırılmasını təklif edənlər sırasında yer alıb. O düşünür ki, bu, əsgərlərin döyüşlərdə iştirak üçün daha effektiv və səmərəli şəkildə hazırlanmasına imkan verəcək.
Sfera.az-ın məlumatına görə, Kremlin sözçüsü Dmitri Peskov bu barədə yeni açıqlama verib. O, bu gün keçirilən mətbuat konfrasında deyib ki, orduda hərbi xidmət müddətinin iki ilədək artırılması ilə bağlı qərar Müdafiə Nazirliyinin sorğu və tövsiyələrindən asılıdır. Onun sözlərinə görə, Prezident Administrasiyası bu məsələdən xəbərdar olsa da, hələ ki müzakirə getmir.
“Axı burada həlledici səs Rusiya Federasiyasının Müdafiə Nazirliyinə məxsusdur. Hər şey bu qurumun mövqeyindən, müraciətlərindən və tövsiyələrindən asılıdır. Bununla bağlı isə Müdafiə Nazirliyindən heç bir açıqlama eşitməmişik”, - deyə Dmitri Peskov “Kommersant FM”in sualına cavab olaraq söyləyib.
Qeyd edək ki, Rusiyada 2008-ci ildən məcburi hərbi xidmət müddəti bir ildir.
Günay Rəsulqızı
