Paşinyan DİLEMMA QARŞISINDA: Ya siyasi taleyi, ya da...
“Şərqi Avropada davam edən savaş Ermənistan hakimiyyətini ciddi narahat edir”.
Bunu Sfera.az-a açıqlamasında siyasi şərhçi Kənan Novruzov deyib. O qeyd edib ki, müharibənin necə nəticələnməyindən asılı olmayaraq, İrəvanı ancaq təhlükə gözləyir:
“Çünki Rusiya qələbə qazansa, iştahı daha da artacaq və region ölkələrinə təzyiq göstərəcək. Əks halda isə Ermənistan regiondakı "çətirini" itirəcək. Hər iki ssenari Paşinyan üçün arzuolunmazdır. Ona görə də Ermənistan iqtidarı Türkiyənin "çətiri altına keçməyə" tələsir. Əlbəttə, Paşinyan həm də daxili auditoriyanı bu prosesə hazırlayır. Onun dünən hökumətin iclasıda Türkiyə ilə münasibətlər barədə açıqlaması həm də bu kontekstdən qiymətləndirilməlidir. İndi Ermənistan baş naziri üçün ən çətin məsələlərdən biri daxildəki radikal kəsimi Türkiyə ilə diplomatik münasibətlərin bərpasına hazırlamaqdır. Paşinyan onları inandırmalıdır ki, başqa yol yoxdur”.
Müsahibimiz bildirib ki, İrəvanla Ankara arasında münasibətlər normallaşdıqca Ermənistandakı etiraz dalğası güclənəcək:
“Bu, Rusiyanın əli ilə də ola bilər. Çünki Rusiya Ermənistanla Türkiyə arasında münasibətlərin normallaşmasını istəmir. Ermənistanda süni xaos yaratmaq şimal qonşumuz üçün elə də çətin deyil. İndi Paşinyan üçün kifayət qədər çətin mərhələdir. Türkiyə ilə diplomatik münasibətlərin bərpası onun üçün ən prioritet istiqamətlərdən biri olsa da, risklər də böyükdür. Bu mənada Ermənistan iqtidarı dövlətinin gələcəyi ilə özünün siyasi taleyi arasında qalıb. Hazırda Nikoldan ən çox tələb olunan məhz siyasi iradədir”.
Günay Rəsulqızı
