Qanunsuz silahlı birləşmələrdə iştirak edənləri hansı cəzalar gözləyir? – AÇIQLAMA
Dövlət Təhlükəsizliyi Xidmətinin İran kəşfiyyatının nəzarəti altında yaradılmış və Azərbaycana qarşı ayaqlandırılan qanunsuz silahlı birləşməni ifşa etməsi geniş müzakirələrə səbəb olub. Digər tərəfdən qurum hər hansı qanunsuz silahlı birləşmələrdə iştiraka cəlb edilən Azərbaycan vətəndaşlarına qarşı ən kəskin tədbirlərin görüləcəyini, onların ciddi cinayət məsuliyyəti ilə üzləşəcəklərini vurğulayıb.
Maraqlıdır, sözügedən əməllərə cəlb edilən vətəndaşları qanunvericiliklə hansı cəzalar gözləyir?
Bununla bağlı Sfera.az-a açıqlama verən vəkil Turan Abdullazadə deyib ki, Azərbaycan Respublikası Cinayət Məcəlləsinə əsasən, qanunvericiliklə nəzərdə tutulmayan silahlı birləşmələri və ya qrupları yaratma cinayət məsuliyyətinə səbəb olur:
“Belə ki, həmin məcəllənin 279-cu maddəsinə əsasən, qanunvericiliklə nəzərdə tutulmayan silahlı birləşmələr və ya qruplar yaratma, eləcə də onların yaradılmasında və fəaliyyətində iştirak etmə, onları silahla, döyüş sursatı ilə, partlayıcı maddələrlə, hərbi texnika ilə, yaxud əsgəri ləvazimatla təchiz etmə— üç ildən səkkiz ilədək müddətə azadlıqdan məhrum etmə ilə cəzalandırılır. Dini düşmənçilik, dini radikalizm və ya dini fanatizm zəminində bu məcəllənin 279.1-ci maddəsində nəzərdə tutulan silahlı birləşmələr və ya qruplar yaratma, həmin birləşmə və ya qruplarda iştirak etmə isə –altı ildən on ilədək müddətə azadlıqdan məhrum etmə ilə cəzalandırılır. Bu əməllər adamların həlak olmasına və ya digər ağır nəticələrə səbəb olduqda—on iki ildən iyirmi ilədək müddətə azadlıqdan məhrum etmə və ya ömürlük azadlıqdan məhrum etmə ilə cəzalandırılır”.
Müsahibimizin sözlərinə görə, bundan əlavə, silahlı qüvvələrimizdən və qanunvericiliklə nəzərdə tutulmuş digər silahlı birləşmələrdən Azərbaycan xalqına və konstitusiyalı dövlət orqanlarına qarşı istifadə etmə— yeddi ildən on iki il müddətə azadlıqdan məhrum etmə ilə cəzalandırılır:
“Həmçinin terrorçuluğun, qanunvericiliklə nəzərdə tutulmayan silahlı birləşmələrin və ya qrupların, mütəşəkkil dəstələrin və ya cinayətkar birliklərin (cinayətkar təşkilatların) maliyyələşdirilməsi üçün nəzərdə tutulan və ya istifadə olunan əmlak xüsusi müsadirə olunur”.
Günay Rəsulqızı,
Sfera.az
