“Putin Rusiyasına nifrət edirəm...” – Rusiyalı iş adamı

Kreml rusiyalı milyarder Oleq Tinkov və “Revolut” fintex startapının qurucusu, milyarder Nikolay Stronskinin Rusiya vətəndaşlığından imtina etməsinə reaksiya verib.

Sfera.az bildirir ki, bu barədə Kremlin sözçüsü Dmitri Peskov danışıb. Peskov iş adamlarının bu qərarını onların hüququ kimi qiymətləndirib. Onun sözlərinə görə, həmin milyarderlər Rusiyada bizneslə məşğul olmurlar.

“Bu, onların haqqıdır. Əslində, burada onların biznesi yoxdur. Yəni həmin şəxslər indi ölkəmizdə sahibkarlıq həyatının iştirakçısı deyillər. Deyəcəklərim budur”, deyə Kremlin sözçüsü əlavə edib.

Məlumata görə, Nikolay Stronskinin Rusiya vətəndaşlığından imtina etməsi barədə danışan “Revolut”un sözçüsü “Nik – Böyük Britaniya vətəndaşıdır. Bu ilin əvvəlində, o, Rusiya vətəndaşlığından imtina edib”, – deyə söyləyib.  O xatırladıb ki, Stronskinin Rusiyanın Ukraynadakı müharibəsi ilə bağlı mövqeyi bəllidir. Milyarder hərbi əməliyyatların dərhal dayandırılmasının tərəfdarıdır.

Rusiyalı milyarder Oleq Tinkov isə sosial media hesabında “Rusiya vətəndaşlığından imtina etmək qərarına gəldim. Dinc qonşuları ilə müharibəyə başlayan, hər gün günahsız insanları qətlə yetirən faşist ölkə ilə əlaqəli ola bilmərəm və olmayacam. Ümid edirəm ki, digər rus iş adamları da mənim kimi edər və bu da Putin rejimini zəiflədər,məğlubiyyətə sövq edər. Putin Rusiyasına nifrət edirəm, amma açıq şəkildə müharibəyə qarşı çıxan bütün rusları sevirəm”, deyə qeyd edib.

Xatırladaq ki, hərbi əməliyyat başlayandan bəri “Forbes” siyahısında yer alan beş iş adamı Rusiya vətəndaşlığından imtina edib.

Günay Rəsulqızı