“Qarabağın statusunu gələcək nəsillərin öhdəsinə buraxmaq lazımdır” – Səfir

"Soçidə keçirilən görüşün müddəti və onun hazırlanması sübut edir ki, bütün nizamlanma məsələləri üzrə substantiv danışıqlar aparılıb".

Sfera.az xəbər verir ki, bunu Rusiyanın Ermənistandakı səfiri Sergey Kopirkin bu gün jurnalistlərlə keçirdiyi brifinqdə Azərbaycan, Ermənistan və Rusiya liderlərinin Soçidə keçirilən üçtərəfli görüşünə münasibət bildirərkən deyib.

“Prezidentimizin dediyi kimi, biz hələ bütün məsələlərdə razılığa gələ bilməmişik, lakin bu müzakirənin baş tutması çox vacibdir. Tərəflərin həqiqətən də nizamlanma prosesində irəliləməyə hazır olduqlarını göstərməsi çox vacibdir. Dağlıq Qarabağın statusu məsələsini gələcək nəsillərin öhdəsinə buraxmaq lazımdır, o zaman hamı üçün məqbul olacaq və məsələnin ədalətli həllinə imkan verəcək şərait yaradılacaq”, -deyə o, qeyd edib.

Rusiyalı diplomat regionda kommunikasiyaların bloklanması mövzusuna toxunaraq deyib ki, Rusiyanın prinsipi rabitənin keçəcəyi ölkənin suverenliyinə hörmət etməkdir.

Əzizə Zeynal