Dollar daha bahalaşmayacaq? – Maliyyə bazarlarında fərqli fikirlər 

Dolların məzənnəsi son bir ayda minimum səviyyəyə enməsinə baxmayaraq, ABŞ valyutasının yenidən bahalaşma ehtimalı qalır.

Sfera.az xəbər verir ki, ABŞ-ın böyük investisiya qurumu olan “JPMorgan” və Yaponiyanın investisiya təşkilatı “Fivestar Asset Management” yaxın aylarda dolların bahalaşmasının mümkün olduğunu proqnozlaşdırıblar. Bu maliyyə qurumları hesab edir ki, ABŞ-da faiz artımı davam etdikcə dollarda bahalaşma imkanları qalacaq. 

“Bloomberg”in məlumatına əsasən, “JPMorgan”dan bildirilib ki, hazırda dolların zəifləməsinin səbəbini müəyyən etmək çətindir: "FED (ABŞ mərkəzi bankı – red.) hələ faizləri maksimum həddə qədər artırmayıb. Həmçinin ABŞ iqtisadiyyatı digər iqtisadiyyatlarla müqayisədə daha dayanıqlı görünür. Buna görə də, dolların bahalaşma imkanları var".

“Fivestar Asset Management”də də düşünürlər ki, dollar rallisi hələ bitməyib: “Dolların zirvədən dönüş nöqtəsini hələ görməmişik. FED-in uçot dərəcəsini nə qədər artıracağını dəqiq görməyincə bahalaşmanın sonuna çatdığını deyə bilmərik".

Lakin dolların bahalaşma tendensiyasının tərsinə dönəcəyini düşünən qurumlar da var. Yaponiyanın iri banklarından olan “Sumitomo Mitsui Trust Bank”dan deyiblər ki, dollar zirvəsinə çatıb-çatmadığını görmək üçün vaxt lazımdır. Bank hesab edir ki, mövcud şərtlər dolların pik nöqtəyə çatdığını göstərir.

Vasif,
Sfera.az