Astana görüşü: Ərdoğan və Putin hansı məsələləri müzakirə edəcək?

Astanada keçiriləcək sammitdə Rusiya prezidenti Vladimir Putinin “Şimal axını”ndan Avropaya qaz tranzitinin Qara dənizə daşınması və Türkiyədə Avropanın ən böyük qaz qovşağının yaradılması təklifinə baxılacaq.

Sfera.az Türkiyə mətbuatına istinadən bildirir ki, təklif Rusiya prezidentinin Astanada türkiyəli həmkarı Rəcəb Tayyib Ərdoğanla gözlənilən görüşü zamanı nəzərdən keçiriləcək.

Xatırladaq ki, Putin Rusiyanın “Şimal axını” vasitəsilə Avropaya qaz tədarük etməyə hazır olduğunu bildirmişdi. Daşınma zamanı Baltik dənizi əvəzinə Qara dəniz tranzitindən istifadə olunacaq. Putin Avropanın ən böyük qaz qovşağının Türkiyədə yaradıla biləcəyini vurğulayıb.

Putinin çıxışından sonra Rusiyanın “Qazprom” şirkəti Türkiyə və Avropa İttifaqı sərhədində qazpaylayıcı qovşaq inşa edə biləcəyini açıqlayıb.

Öz növbəsində Türkiyənin enerji və təbii ehtiyatlar naziri Fatih Dönməz Rusiya prezidentinin təklifinin nəzərdən keçiriləcəyini bildirib. O, Rusiya tərəfinin artıq analoji infrastruktur obyektləri inşa etdiyini qeyd edib.

Qeyd edək ki, Ərdoğan və Putin arasında görüş oktyabrın 13-də Astanada baş tutacaq. Ölkə liderləri Ukraynadakı münaqişəni, ikitərəfli münasibətləri müzakirə edəcək, cari məsələlər ətrafında fikir mübadiləsi aparacaqlar.

Aynil