Kiyev Qərbə yeni təhlükəsizlik sazişi təklif edib

Kiyev administrasiyası Qərbə yeni təhlükəsizlik sazişi təklif edib.

Sfera.az bildirir ki, bununla bağlı “Foreign Policy” jurnalı məlumat yayıb. Xəbərə görə, Ukrayna rəsmiləri NATO-nun keçmiş baş katibi Anders Rasmussenlə görüşüb. Qeyd olunub ki, ukraynalılar ABŞ-İsrail münasibətlərinə bənzər bir modelin həyata keçirilməsini istəyirlər.

“Sözügedən model Rusiya təhlükəsinə qarşı Ukrayna üçün hüquqi cəhətdən məcburi təminatları ehtiva edir. Model həmçinin qabaqcıl müdafiə silahları ilə təminat və Ukrayna ordusunun təlimini əhatə edir”, deyə jurnalda bildirilib.

“Foreign Policy” vurğulayıb ki, yazılı şəkildə təhlükəsizlik zəmanəti almaq nəinki digər Qərb ölkələri, hətta Vaşinqton üçün ağır təklif ola bilər. Jurnalın məlumatına əsasən, NATO-nun keçmiş baş katibi Rasmussen keçən həftə Vaşinqtona səfər edib və bu səfərin məqsədi müzakirə olunan planın ABŞ və digər aparıcı Qərb müttəfiqlərinə təqdim edilməsi üçün zəmin yaratmaq olub.

Xatırladaq ki, Ukrayna lideri Zelenski Putinin saxta referendumlarından sonra təcili olaraq NATO-ya üzvlük üçün müraciət etmişdi.

Günay Rəsulqızı