Kral ailəsində bir ilk... Kral Çarlzın qərarı ilə ritual tarixə çevrilir
Anasının ölümündən sonra taxta çıxan Kral III Çarlzın tacqoyma mərasimi böyük maraq doğurmağa davam edərkən, İngiltərə mətbuatı mərasimlə bağlı diqqətçəkən məlumatlar əldə edib.
İngiltərə kraliçası II Elizabetin yas mərasimi başa çatdığından, gözlər İngiltərədə başqa bir mərasimə çevrilib: Kral III Çarlzın tacqoyma mərasimi.
Sfera.az İngiltərə mətbuatına istinadən bildirir ki, “Qızıl Qlobus Əməliyyatı” adlı mərasimlə bağlı yeni məlumatlar əldə olunub.
Belə ki, mərasim qeyri-adi şəkildə baş tutacaq.
Anasının 3 saatlıq tacqoyma mərasimindən fərqli olaraq, Kral 1 saat çəkən sadə mərasimlə kifayətlənəcək.
Qədim və uzunmüddət davam edən rituallar, o cümlədən hökmdara qızıl külçələr təqdim etmək də məhz bu vaxta qənaət etmək səbəbilə ixtisar olunacaq.
Əldə edilən məlumata görə, qonaq siyahısı 8 mindən 2 minə enəcək.
Yəni mərasimə minlərlə zadəgan dəvət olunmayacaq. Mövzu ilə bağlı hələlik rəsmi açıqlama verilməsə də yeni kralın 2023-cü il iyunun 3-də rəsmi tac qoyma mərasiminin baş tutacağı gözlənilir.
Kral Çarlz gələn il tacqoyma mərasimində 74, həyat yoldaşı Kamilla isə 76 yaşında olacaq. Bununla da o indiyə qədər taxta keçmiş ən yaşlı kral hesab olunur.
Qeyd edək ki, İngiltərə krallarının ən yaşlısı 1830-cu ildə 64 yaşında tac qoyan IV Uilyam idi. Kralın hakimiyyəti cəmi 7 il davam etmişdi.
Yeni Kral 56 müstəqil ölkədən və 2,4 milyard insandan ibarət Millətlər Birliyinin rəhbəridir. Bu ölkələrin 14-də o həm də dövlət başçısıdır.
Xatırladaq ki, Kral İngiltərə, Şotlandiya, Uels və Şimali İrlandiyadan ibarət Böyük Britaniyanın dövlət başçısıdır. Lakin onun səlahiyyətləri simvolikdir. Siyasi baxımdan neytral qalır.
Hökumətdən gündəlik göndərişlər, məsələn, vacib görüşlərdən əvvəl brifinqlər və ya onun imzasını tələb edən sənədlər qırmızı dəri çantada ona çatdırılır.
Baş nazir bir qayda olaraq hər çərşənbə Bukingem sarayında kralla görüşür və ona hökumət məsələləri barədə məlumat verir.
Bu görüşlər tamamilə qapalı keçir və deyilənlərlə bağlı heç bir rəsmi qeyd olmur.
Aynil
