Əhali banklara nə qədər pul əmanət edib? - STATİSTİKA
2022-ci ilin sentyabrın 1-nə olan məlumata əsasən, Azərbaycan banklarında vətəndaşlarımızın və əcnəbilərin ümumilikdə 10,858 milyard manat dəyərində əmanəti var.
Sfera.az xəbər verir ki, əmanətlərin həcmi bu ilin əvvəlindən 1,617 milyard manat və ya 17,5 faiz, son bir ildə isə 2,3 milyard manat, yaxud 27 faiz artıb.
Bu qədər vəsaitin 9,982 milyard manatı, yəni 92 faizi Azərbaycan vətəndaşlarına, 876 milyon manatı əcnəbilərə məxsus olub. Əmanətlərin strukturuna diqqət yetirdikdə görürük ki, əmanətlərin sürətlə artmasında Azərbaycan vətəndaşları ilə yanaşı əcnəbilər də mühüm rol oynayıb.
Azərbaycan vətəndaşlarının pulu son bir ildə 1,721 milyard manat artdığı halda, əcnəbilərin pulu 579 milyon manat artıb. Onu da bildirək ki, banklara pul qoyanların əksər hissəsi əmanətin manatla yerləşdirilməsinə üstünlük verir. Belə ki, ümumi əmanətlərin 6,548 milyard manatı (60,3 faizi) milli valyutada, qalanı xarici valyutadadır.
Vasif,
Sfera.az
