Dünən Ermənistan Silahlı Qüvvələrinin Baş Qərargah rəisinin müavini, general-mayor Arakel Martikyan Qeqarkunik vilayətinin Kut kəndində Ermənistanda akkreditə olunmuş səfirlərlə görüşüb.

Generalın görüş zamanı verdiyi açıqlamalar diqqət çəkir. Onun sözlərinə görə, Ermənistanın suveren sərhədlərinin bərpası ilə bağlı aydın və konkret əmr var. General qeyd edib ki, Silahlı Qüvvələrin vəzifəsi Ali Baş Komandanın əmrini yerinə yetirməkdir.

Arakel Martikyanın açıqlamasından belə məlum olur ki, Ermənistan Azərbaycan ordusunu sərhəddə əvvəlki mövqelərə qaytarmaq üçün hücuma hazırlaşır. Qeyd edək ki, hakim "Mülki müqavilə” fraksiyasının deputatı, parlamentin müdafiə və təhlükəsizlik məsələləri üzrə komissiyanın rəhbəri Andranik Köçəryan da açılqlamasında bildirib ki, Ermənistan bütün mümkün ölkələrdə ehtiyaclarını ödəyə biləcək silahlar axtarır. 
 

Erməni generalın söylədiklərini Sfera.az-a şərh edən politoloq Əlimusa İbrahimovun fikrincə, A.Martikyanın bəyanatları ermənilərin revanşist fikirlərinin hələ də yaşadığını göstərir:

“Ermənistanda olan istənilən general, hətta Müdafiə naziri belə sərhədlərin bərpa edilməsi, Azərbaycanla müharibənin başlaması haqqında bəyanatlar verə bilər. Lakin bu sözlərin arxasında hansısa əməl dayanmırsa, deməli, sadəcə blef edirlər. Generalın bəyanatı da elə-belə sözdür və 44 günlük müharibə zamanı Ermənistan tərəfinin verdiyi bəyanatlardan heç nə ilə fərqlənmir. Ermənistanın Azərbaycanla müharibəyə hazırlaşması nə bir sözdən ibarətdir, nə də 1-2 saatlıq işdir. Ermənilər həqiqətən də müharibəyə hazırlaşsa, sərhədlərə qoşun yeritmək istəsə, bunun üçün uzun müddət lazımdır. Məlumdur ki, Ermənistan qoşunları da indiki şəraitdə Azərbaycanla müharibə aparmaq iqtidarında deyil. Düşünmürəm ki, generalın verdiyi bəyanatın arxasında hansısa əməl dayanır. Ancaq Ermənistan müharibəyə hazırlaşıb məqsədlərinə çatmaq istəyirsə, bu, onlar üçün heç də yaxşı olmayacaq. Çünki hər zaman Azərbaycan Ermənistandan hər baxımdan çox güclü olub. Generalın dedikləri daxili auditoriyanı sakitləşdirmək üçün verilən bəyanatdır. Azərbacyan isə istənilən halda əlini-qolunu bağlayıb oturmur. Düşmən tərəfdən hansısa hərəkət olarsa, ordumuz nə etməyin lazım olduğunu çox gözəl bilir”.

Yeganə