Milyonlarla xəstə üçün ümid işığı olacaq xəbər - İlk dərman olacaq
Müasir dövrün qorxulu xəstəliklərindən biri olan Alzheimer xəstəliyinin müalicəsində perspektivli dəyişiklik görünür.
Yapon dərman istehsalçısı Eisai, ABŞ-ın biotexnologiya şirkəti Biogen ilə birlikdə hazırladıqları alzheimer dərmanının simptomların inkişafını ləngidə biləcəyini açıqlayıb.
Sfera.az xarici mətbuata istinadən bildirir ki, Yaponiyada ilkin simptomları olan təxminən 1800 xəstə üzərində aparılmış klinik sınaqlar zamanı “Lecanemab” adlı dərmanın beyində toplanan və sinir hüceyrələrini məhv edən, xəstəliyin əsas səbəbi sayılan amiloid beta adlı zülal növünü aradan qaldırdığı bildirilib.
Dərmanın yaddaşın pisləşməsi və qavrayışın pozulması kimi simptomların gedişatını 27% azaltdığı bildirilərkən, şirkət Lecanemab üçün 2023-cü ildə Yaponiya ABŞ və Avropada patent almağı hədəflədiyini açıqlayıb.
Əgər təsdiqlənsə, Lecanemab Yaponiyada xəstəliyin səbəbinə nüfuz edən və simptomların inkişafını ləngidən ilk Alzheimer dərmanı olacaq. Ölkədə mövcud olan dərmanlar indiyə qədər sadəcə simptomları aradan qaldırmağa kömək edib.
Xalq arasında demans olaraq da bilinən xəstəlik növlərindən biri olan Alzheimer xəstəliyi ilkin dövrdə sadəcə unutqanlıqla müşahidə olunur.
Sonrakı mərhələlərdə xəstələr unutqanlıqla yanaşı emosiya və düşüncələri idarə etməkdə çətinlik çəkirlər.
Xatırladaq ki, 60 yaşdan sonra tez-tez rast gəlinən xəstəlik, insanın son mərhələlərində gündəlik işlərini yerinə yetirə bilməməsinə qədər gətirib çıxarır.
Aynil