“Mənzilə ilk baxışın keçirilməsi 30.8-ci saniyədə baş tutub”.

Sfera.az bildirir ki, bunu Azərbaycan İnternet Forumunun rəhbəri Osman Gündüz Mənzil İnşaatı Dövlət Agentliyinin (MİDA) növbəti layihəsinin statistikasından danışarkən deyib.

O qeyd edib ki, mənzil seçiminin təsdiqlənməsi ilk olaraq təxminən 36-cı saniyədə baş tutub:

“Satışdakı sonuncu mənzilə baxışın keçirilməsi 1.28-də, yəni 1 dəqiqə 28-ci saniyədə baş tutub. Bu o deməkdir ki, artıq 1 dəqiqə 28 saniyədən sonra bütün mənzillər baxış prosesində olub. Yəni bu andan sonra kimsə baxış üçün mənzil seçimi edə bilməzdi. Sonuncu mənzili seçiminin təsdiqlənməsi isə 1 dəqiqə 37-ci saniyədə baş tutub. Yəni bu andan etibarən sistemdə seçim üçün heç bir mənzil olmayıb”.

Ekspert bildirib ki, MİDA-nın bu satışı əvvəlkilərdən xeyli fərqlənib:

“Sistemdə aparılan təhlükəsizlik tədbirləri botlara və robotlara seçim imkanı verməyib. Eyni zamanda qeyd etmək lazımdır ki, DEMO ilə bağlı yetərli məlumat olmadığından bəzi istifadəçilərin seçimi uğurlu olmayıb. Gələcəkdə MİDA  "Güzəştli mənzil sisteminin" daha da təkmilləşdirilməsi, DEMO ilə bağlı daha ətraflı məlumatların çatdırılması, satışa az qalmış daha əhatəli məlumatların verilməsi, xüsusilə də, yeni bir alternativ satış üsulunun təqdim olunması istiqamətində səylərini gücləndirməlidir”.

Günay Rəsulqızı,

Sfera.az