Avropa Komissiyası ittiham edilir - Ərzaq böhranı qaçılmaz hala gəlir
Avropa Kommisiyası Rusiyadan Avropaya daşınan gübrələrə qeyri-qanuni embarqo tətbiq etməkdə ittiham edilib.
Sfera.az xarici mətbuata istinadən bildirir ki, Brüssel Rusiyadan gübrələrinin alınmasına və daşınmasına qadağa qoyub, bu da Avropa İttifaqına (Aİ) üzv dövlətlərin narazılığına səbəb olub.
Səbəb olaraq isə Rusiya və Ukrayna ilə bağlanmış müqavilələrin şərtlərinin pozulması əsas göstərilir.
Rusiya isə gübrə ehtiyatı olmayan ölkələrə pulsuz gübrə verməyə hazır olduğunu bildirib.
Mütəxəssislər hesab edir ki, sanksiyaların yeddinci paketi Rusiyanın kənd təsərrüfatı məhsulları və gübrələrinin Avropa embarqosundan azad edilməsini nəzərdə tutur.
Bundan başqa, sözügedən paket 21 iyul qətnaməsi birliyin “ərzaq çatışmazlığına səbəb ola biləcək hər addımdan qaçmaq” öhdəliyini bir daha təsdiqləyir.
Bu qətnamədən bir neçə həftə sonra Avropa Komissiyası Rusiyadan gübrələrin alınmasına, daşınmasına və tranzitinə qadağa qoyub. Yalnız sentyabrın 19-da tələsik bu embarqonu ləğv edib.
“Liberation” müxbiri Jan Kuatremerin sözlərinə görə, bu yolla AK nəinki problemi həll etməyə çalışır, əksinə onu daha da dərinləşdirir. Nəticə etibarı ilə mövcud iqtisadi problemlərə enerji böhranından az əhəmiyyətli olmayan digər bir problem əlavə etmək olmaz.
Öz növbəsində BMT-nin Baş katibi Antonio Quterreş sentyabrın 20-də BMT Baş Assambleyasında çıxışı zamanı Rusiyadan gübrə ixracı ilə bağlı problemlərin təcili həllinə çağırıb. O qeyd edib ki, bazarda gübrə ilə bağlı vəziyyət sabitləşməsə, ərzaq böhranı qaçılmazdır.
Xatırladaq ki, hal-hazırda Rusiyanın 300 min ton gübrəsi Qərbin tətbiq etdiyi sanksiyalar səbəbindən Avropa limanlarında ilişib qalıb.
Aynil
